Eftir tveggja mánaða lækkun á verðlagi matvöru hækkar það nú með nokkrum rykk. Hækkunin milli mánaðanna september og október nemur einni prósentu, að mestu leyti vegna hækkunar á kjötvöru. Í fréttatilkynningu frá verðlagseftirliti Alþýðusambands Íslands kemur fram að þótt aðrir flokkar hækki meira – súkkulaði hækkar til að mynda enn, mest hjá Nóa Síríus – þá vegur kjötið þyngra í neyslu.
„Þetta er fyrsti mánuðurinn frá því í mars þar sem verðlagseftirlitið mælir ekki lækkun verðlags í neinni verslun milli mánaða.“
Í tilkynningu segir að verðlagseftirlitið hafi nýlega greint frá því að verð hækkaði á vörum SS víða fyrir tveimur vikum. Vörur frá Goða hafi einnig hækkað, en lítilla breytinga verður vart á verði Ali og Stjörnugríss, þar sem verð lækka meira að segja í Nettó.
„Súkkulaðiverð hefur hækkað mikið á árinu og heldur hækkunin áfram þennan mánuðinn hjá Nóa Síríus og Freyju. Langmesta hækkunin er á vörum frá Nóa Síríus í Bónus. Í Nettó lækkar meðalverðið á vörum allra framleiðenda nema Nóa Síríus.“
Verslanir Samkaupa – Nettó, Kjörbúðin, Krambúðin og Iceland – hafa verið á miklu ferðalagi í verðlagningu síðan í sumar. Verð þar hækkaði verulega í júlí og lækkaði svo um munaði í ágúst, sem átti nokkurn þátt í sveiflum verðlagsvísitölu matvöru þá mánuði.
„Nettó-breytingin, ef svo má segja, er að röðun verslana á matvörumarkaði er nú önnur en áður. Nettó, sem áður var tíðum um 12% yfir lægsta verði, eða 11% hærra en Bónus, er nú 6,4% yfir lægsta verði að meðaltali – aðeins um 3% yfir Bónus. Fjarðarkaup, sem áður voru rétt undir Nettó, eru nú 14,7% yfir lægsta verði að meðaltali.
Kjörbúðin hefur einnig færst til og er nú að jafnaði ódýrari en Extra, öfugt við það sem áður var. Hins vegar hafa Iceland og Krambúðin tekið kipp og eru nú sjónarmun lengra frá lægsta verði en þær voru fyrir verðhækkanir og -lækkanir í sumar.“
Prís er enn ódýrasta matvöruverslunin sem verðlagseftirlitið skoðar reglulega, en verð þar er að meðaltali 0,8% hærra en þar sem það er lægst. Bónus er nú að meðaltali 3,42% yfir lægsta verði og Krónan 4,30%.
Í óreglulegri skoðun á verðlagi í Costco um helgina kom í ljós að MS nýmjólk fékkst þar á 149 krónur fyrir lítra. Verð mjólkurinnar í Prís er 197 krónur og í Bónus 209 krónur. Nýmjólk kostaði síðast undir 150 krónum í Bónus haustið 2018, eða fyrir sex árum. Í sumar kostaði nýmjólk í Costco 199 krónur. Fleiri vörur sem skoðaðar voru:
„Sjá má að Nettó er hér komið á sama verð og Krónan. Þetta gildir ekki aðeins um þessa handfylli af vörum. Þegar 1363 vörur voru skoðaðar sem finna má í bæði Nettó og Krónunni voru 939, eða 69%, á sama verði.
Þegar skoðaðar eru vörur sem fundust í Nettó, Bónus og Krónunni er gamalt mynstur sjáanlegt: Krónan er einni krónu dýrari en Bónus í 556 tilfellum af 617, eða í 90% tilfella. Nýlundan er að Nettó er nú líka einni krónu dýrari en Bónus í 72% tilfella. Nettó og Krónan voru á sama verði í 79% tilfella í þessum síðari samanburði. “
„Verðlagsbreytingar eru reiknaðar með vigtun vöruflokka og verslana. Þegar talað er um breytingu á verðlagi er um að ræða veginn útreikning, en breyting á verði merkir stakan samanburð eða óvegið meðaltal.“
