Eins og fram hefur komið í fréttum síðustu daga, þá er talið að Norður-Kóreumenn hafi sent, eða séu við það að senda, mörg þúsund hermenn til Úkraínu til að berjast með rússneska hernum. Áður höfðu þeir séð Rússum fyrir flugskeytum, skotfærum og fleiru fyrir her þeirra.
Camilla Tenna Nørup Sørensen, lektor við danska varnarmálaskólann, sagði í samtali við Jótlandspóstinn að þetta aukna samstarf Rússa og Norður-Kóreu falli ekki vel í kramið í Kína.
„Þegar ég les kínverska fjölmiðla og ræði við kínverska kollega mína, þá gætir greinilega mikils pirrings hjá þeim. Þeir líta á bæði Rússland og Norður-Kóreu sem ríki, sem eiga að hlusta á það sem Kína segir og reyna að taka með í reikninginn hvernig það, sem þeir eru að gera, hefur áhrif á kínverska hagsmuni. Þeir sjá þeir ekki frá þeim,“ sagði hún.
Kínverjar hafa árum saman verið helsta og nánast eina bandalagsríki Norður-Kóreu. Meðal annars sem stærsta viðskiptaland einræðisríkisins. Frá 1961 hefur varnarsamningur verið í gildi á milli ríkjanna og var hann endurnýjaður 2001. Þetta er eini varnarsamningurinn sem Kína hefur gert við annað ríki.
Norður-Kórea er hins vegar með tvo slíka samninga, hinn var undirritaður í júní og er við Rússa.
Sørensen sagði að eitt af því sem sameinar Rússa og Norður-Kóreumenn sé að bæði ríkin vilja draga úr því hversu háð þau eru Kína. Þau hafi bæði orðið sífellt háðari Kína á síðustu árum samhliða því að samband þeirra við Vesturlönd hafi versnað. Af þeim sökum styrki þau samstarf sitt núna og segir hún að það sé einnig tilraun af þeirra hálfu til að mynda mótvægi við Kína.
Þetta segir hún ekki þjóna hagsmunum Kínverja. „Kínverjar eiga erfitt með að beita ríkin miklum þrýstingi, sérstaklega Norður-Kóreu. Samhliða því að samband Kína við Bandaríkin versnar, þá hafa þeir sífellt meiri þörf fyrir Norður-Kóreu sem einhverskonar stuðpúða á milli Kína og fjölmennra bandarískra hersveita í Suður-Kóreu,“ sagði hún.
Hún sagði einnig að almennt séð hafi Kínverjar ekki áhuga á að óstöðugleiki ríki á Kóreuskaga því það neyði Kínverjar til að beina sjónum sínum meira í þá áttina. Núna vilji Kínverjar beina sjónum sínum að Suður-Kínahafi, Taívansundi og Austkínverska-hafinu.