Nálgumst hvert annað með kærleika, eflum tengslin og sýnum samfélagslega ábyrgð. Þetta er ákallið í samfélaginu í dag og nú er árlegt Kótilettukvöld Samhjálpar framundan, miðvikudaginn 23. Samhjálp býður landsmönnum að taka þátt í þessu árlega fjáröflunarkvöld í veislusal Hilton Hótel Nordica.
„Nú er kallað eftir samfélagslegri ábyrgð, að við ræktum tengslin ekki bara við okkar nánustu heldur einnig nágranna okkar og samborgara. Nýkjörin forseti lýðveldisins skorar á alla Íslendinga að gerast riddarar kærleikans. Samhjálp hefur starfað í rúm 50 ár með kærleikann að vopni. Teygt fram hjálparhönd til þeirra sem höllustum fæti standa í samfélaginu, mætt öllum að vinsemd og virðingu hvar sem þeir eru og minnt á að við erum öll fólk. Kótilettukvöldið er stærsta árlega fjáröflunarverkefni Samhjálpar og nú gefst öllum tækifæri til að sýna kærleiksþel og kaupa miða. Skemmta sér í góðum hópi og gera gott um leið,“
segir Steingerður Steinarsdóttir, verkefna- og ritstjóri Samhjálpar.
Húsið opnar kl 18.30 en dagskráin hefst kl. 19.00 og stendur til 22.00. Frábærir tónlistarmenn og skemmtikraftar gefa vinnu sína og sjá um að engum leiðist á þessu skemmtilega kvöldi.
Boðið verður upp á gómsætar kótilettur ásamt meðlæti en Klúbbur matreiðslumeistara sér um eldamennskuna og því ætti enginn að fara svangur heim.
Auk góðrar tónlistar verða sagðar reynslusögur. Einnig er aðgöngumiðinn á viðburðinn happdrættismiði þar sem hægt er að hreppa glæsilega vinninga. Vinningaskrá inniheldur meðal annars vinninga frá:
Hótel Varmaland
Sky Lagoon
Forlaginu
Veru Design
Termu snyrtivöruheildverslun
Nathan og Olsen
Omnom súkkulaði
Allur ágóði rennur til viðamikils starfs Samhjálpar en samtökin meðal annars hafa boðið heimilislausum margvíslega aðstoð og aðhlynningu nú í bráðum hálfa öld. Í salnum er lagt á borð fyrir 300 manns en miðarnir eru fljótir að fara og um að gera að tryggja sér pláss sem fyrst. Miðasalan fer fram á tix.is.
