Kona um þrítugt var þann 16. október síðastliðinn sakfelld fyrir líkamsmeiðingar af gáleysi og umferðarlagabrot með því að hafa í ágústmánuði árið 2023 ekið á barn sem var að hjóla yfir gangbraut.
Konan var sökuð um að hafa ekki sýnt nægilega varúð og aðgæslu og hafa ekið of hratt miðað við aðstæður. Barnið viðbeinsbrotnaði, fékk hrufl og skrapsár víða um líkamann og glóðarauga.
Dómurinn var kveðinn upp í Héraðsdómi Norðurlands eystra og má búast við því að atvikið hafi átt sér stað á Akureyri en það kemur ekki fram í texta dómsins.
Ákæruvaldið féll frá kröfu um sviptingu ökuréttar við þingfestingu málsins.
Konan játaði sök og var dæmd í 30 daga skilorðsbundið fangelsi. Hún hefur hreinan sakaferil.
Konan neitaði bótakröfu í málinu og verða þær teknar fyrir í sérstöku einkamáli.