Dóra Björt Guðjónsdóttir, borgarfulltrúi og frambjóðandi í prófkjöri Pírata til alþingiskosninga, er með ADHD. Þetta hafi haft mikil áhrif á hana í gegnum tíðina og hún verið lögð í einelti af kennurum.
Frá þessu greinir Dóra Björt í aðsendri grein á Vísi í dag.
„Ég er með ADHD. Það kynti undir lágu sjálfsmati í gegnum minn uppvöxt,“ segir Dóra Björt í greininni. „Þegar ég mætti neikvæðu viðhorfi er ég tók of mikið pláss hvort sem það var í skóla eða á öðrum vettvangi, átti erfitt með tímastjórnun, þegar ég talaði of mikið, gat ekki klárað verkefni vegna þess að ég gat ekki einbeitt mér innan um þögla samnemendur mína.. og hvílík sóun á tíma að sitja klukkutímum saman verklaus. Þegar ég var lögð í einelti af kennurum. Þegar mér fannst ég oft hverfa vegna óöryggis því varnargríman til að fela hispursleysið var svo aðþrengjandi. ADHD! Þetta kom allt heim og saman.“
Dóra Björt segir að þessi gríma eigi það enn þá til að gægjast á svæðið en áhrifin hafi þó mildast með meiri sjálfsmildi og sjálfsþekkingu.
„Að við séum að rífa af okkur það sem gerir okkur einstök er ekki bara leiðinlegt heldur líka ákveðinn missir fyrir samfélagið,“ segir Dóra Björt. „En hvað á barn að gera sem fær stanslaust að finna að það sé of mikið, tali of mikið, taki of mikið pláss? Það auðvitað minnkar sig. Þess vegna þarf samfélagið að stækka. Skapa meira pláss og meira rými. Við megum ekki skera niður okkar fegurstu blóm.“
Að sögn Dóru Bjartar hefur vinna með aðstoð sálfræðinga gert hana öruggari í sjálfri sér og hún náð að róa sinn innri gagnrýnanda. Þessi lífsgæði geri henni kleift að starfa áfram á vettvangi stjórnmálanna þar sem fólk þarf að geta sýnt sér mildi þegar gagnrýnin dynur á.
„Það eru lífsgæði sem ekki verða metin til fjár,“ segir Dóra Björt. „En það eru tímar hjá sálfræðingum hins vegar, þeir eru rándýrir en þjónustan svo dýrmæt og mikilvæg. Geðheilbrigði þarf sömu virðingu og alúð og líkamlegt heilbrigði. Aðgengi að ódýrari sálfræðiþjónustu er ekki lúxus eða pjatt heldur lífsnauðsyn.“
