Verslun Eirbergs í Kringlunni skemmdist í brunanum þann 15. júní síðastliðinn og hefur verið lokuð síðan þá. Lokunin virðist þó ekki hafa haft jafn slæm áhrif á fyrirtækið og reiknað var með því að á þeim tíma sem liðinn er frá lokuninni hefur velta fyrirtækisins aukist.
„Bruninn var auðvitað mikið áfall, við höfum jú átt farsælan rekstur í Kringlunni í 10 ár og áttum þar yndislegan tíma með rekstraraðilum, verslunareigendum og viðskiptavinum. Við vissum það að verslunin í Kringlunni yrði ekki starfhæf í lengri tíma en í stað þess að leggja árar í bát lögðum við upp með að horfa frekar á stöðuna sem tækifæri til þess að stokka aðeins upp hjá okkur og bæta þjónustustig í verslun okkar á Stórhöfða 25,“ segir Kristinn Johnson framkvæmdastjóri Eirbergs í tilkynningu.
„Við færðum starfsfólk úr Kringlunni yfir í verslun okkar að Stórhöfða, sem við reyndar þrefölduðum að stærð fyrir nokkru síðan, og jukum enn við þjónustustigið í verslun og í vefverslun. Það kom á daginn — sem við vonuðumst reyndar til — að aðstæður höfðu ekki teljandi áhrif á viðskiptavini okkar, og raunar fór svo að veltan jókst. Við sjáum það skýrt að með góðri þjónustu fáum við ánægða viðskiptavini til framtíðar“ segir Kristinn.
Eirberg hefur því ákveðið að loka verslun sinni í Kringlunni fyrir fullt og allt og halda áfram á nýrri braut. Segja má að það sé í anda fyrirtækisins sem er rótgróið fjölskyldufyrirtæki og á rætur að rekja til ársins 1906 en Eirberg var stofnað í lok árs 2000 þegar Heilbrigðisvörudeild Ó. Johnson & Kaaber og Hjálpartækjabanki Össurar runnu saman í eitt fyrirtæki sem ætlað var að sækja fram á heilbrigðissviði og útvíkka sameinaða starfsemi með auknu vöruframboði.
Eirberg hefur þróast frá því að vera miðstöð hjálpartækja yfir í framsækið fyrirtæki sem nýtur aukinna vinsælda með vandaðar vörur til heilsueflingar og bættra lífsgæða. Um 30 manns starfa hjá fyrirtækinu.
Dagana 2.–7. október hyggst Eirberg launa viðskiptavinum sínum tryggðina síðustu mánuði með því að bjóða öllum sem koma í verslunina að Stórhöfða 25, 5.000 króna afslátt þegar verslað er fyrir 10.000 krónur eða meira.
„Með þessu viljum þakka okkar viðskiptavinum sem hafa staðið með okkur í þessum miklu breytingum og þá sér í lagi okkar viðskiptavinum úr Kringlunni sem hafa lagt leið sína í verslun okkar að Stórhöfða“ segir Kristinn.
