Brynjar Kristensson hlaut reynslulausn í nóvember 2022 á 310 daga eftirstöðvum rúmlega tveggja ára fangelsisrefsingar. Reynslulausnin var veitt til tveggja ára og hefði Brynjar því lokið því tímabili í nóvember á þessu ári. Hann var þó handtekinn í september og er grunaður um stórfellt fíkniefnabrot. Brotið þykir það alvarlegt að jafnvel þó Brynjar hafi ekki verið sakfelldur fyrir brotið þá telst hann hafa rofið skilyrði reynslulausnarinnar. Honum hefur því verið gert að afplána eftirstöðvar refsingar sinnar með úrskurði Héraðsdóms Reykjavíkur sem Landsréttur staðfesti á föstudaginn.
Lögregla hefur nú til rannsóknar mál sem snýr að innflutning á rétt rúmu kílói af kókaíni, en þar er Brynjar talinn eiga hlut að máli. Málið má rekja til þess að um miðjan september fundu tollyfirvöld rúmt kíló af kókaíni í póstsendingu sem var á leið til Íslands. Þó það komi ekki með skýrum hætti fram í úrskurði Héraðsdóms þá má ætla að lögreglu hafi verið gert viðvart og að gerviefni hafi verið komið fyrir í sendingunni.
Á meðan á þessu stóð gaf einstaklingur sig fram á pósthúsi hér á landi og spurði eftir pakkanum. Pakkinn hafði þá ekki skilað sér. Næst var það kona sem kom á pósthúsið eftir að tilkynning hafði borist um að pakkinn væri kominn til landsins. Pósturinn tilkynnti konunni að því miður væri pakkinn týndur en að samband yrði haft við hana þegar hann kæmi í leitirnar. Pakkinn fannst svo og konan sneri aftur og tók við honum. Í bæði skiptin sem konan kom á pósthúsið hafði Brynjar skutlað henni þangað en svo látið sig hverfa. Eftir að konan tók við pakkanum sást hvar hún gekk rakleiðis til fundar við Brynjar, afhenti honum pakkann og gekk svo burt. Brynjar faldi pakkann í geymslu undir stigahúsi á ónefndu hóteli. Svo fylgdist hann með út um glugga hvort nokkur væri að elta konuna. Þegar hann taldi sér það öryggt fylgdi hann konunni eftir og voru þau svo bæði handtekin skömmu síðar.
Brynjari var í kjölfarið gert að sæta gæsluvarðhaldi og einangrun á grundvelli rannsóknarhagsmuna. Lögreglan taldi þó ljóst að hann hefði með meintu broti rofið reynslulausn sem honum var veitt í nóvember 2022, en hann hafði afplánað dóm fyrir þrjár líkamsárásir, þar af eina stórfellda og átti eftir 310 daga óafplánaða af refsingu sinni.
Dómari rakti að samkvæmt lögum um fullnustu refsinga er heimilt að gera manni á reynslulausn að afplána eftirstöðvar refsingar ef hann er undir sterkum grun um að hafa framið nýtt brot sem varðað geti sex ára fangelsi eða lengur. Í þessu tilviki væri Brynjar grunaður um stórfellt fíkniefnabrot og því var honum gert að afplána 310 daga eftirstöðvar refsingar sinnar.
