Uppnám varð við gangbraut nálægt Fellaskóla í Breiðholti þegar fólksbíll og strætisvagn mættust í þrengingu. Hvorugur þeirra vildi bakka og því má segja að um eiginlega störukeppni hafi verið að ræða.

Ökumaður fólksbílsins var með upptöku og náði um tveggja mínútna myndbandi af störukeppninni við strætisvagn á leið númer 12, sem fer frá Ártúni að Skerjafirði.

Á myndbandinu sést hvernig bíll ökumannsins keyrir inn í þrengingu og þegar hann er að koma að lokum hennar keyrir strætisvagninn einnig inn í þrenginguna. Eru þeir þá báðir stopp. Stóð þessi störukeppni yfir í næstum tvær mínútur og sést hvernig farþegi fer fram í til vagnstjórans og á við hann orðaskipti. Að lokum bakkar ökumaður strætisvagnsins og umferðin kemst í samt horf.

Var ökumaðurinn, sem ekki vill koma fram undir nafni, að flýta sér á fund sem hafði byrjað klukkan 17:00 á þriðjudag þegar atvikið gerðist. Viðurkennir hann að hafa kannski verið með smá frekju en telur sig þó hafa verið í rétti.

Einnig telur hann að vagnstjórinn hafi skapað óþarfa hættu og verið með yfirgang. Vagnstjórinn hafi greinilega ætlast til þess að hann myndi bakka þrátt fyrir að fjölfarin gangbraut hafi verið fyrir aftan bíl ökumannsins, gangbraut sem liggur nálægt Fellaskóla.