Vitni sem var í sambandi við brotaþola eftir árásina segir að um manndrápstilraun hafi verið að ræða. Maðurinn hafi reynt að reka fyrrverandi sambýliskonu sína á hol með járnkarli en þegar það hafi ekki tekist hafi hann tekið hana kverkataki. Konan er sögð vera mikið marin á hálsi og hnakka eftir árásina og með varnarsár á höndum eftir manninn. Hún hafi legið meðvitundarlítil á skemmugólfinu þegar komið var að henni skömmu eftir árásina og sagt að maðurinn hafi reynt að drepa hana.
Maðurinn var handtekinn eftir árásina og yfirheyrður af lögreglunni á Egilsstöðum. Hann var látinn laus að lokinni yfirheyrslu. Lögregla lagði ekki fram kröfu um gæsluvarðhald þar sem hún telur að málið liggi ljóst fyrir.
„Hann kom sér fyrir í 300 metra fjarlægð frá henni, þar sem hann getur fylgst með henni. Hann segir að rifflinum sé miðað að húsinu hennar,“ hefur DV eftir aðila sem þekkir til málsins.
Árásin á miðvikudagskvöld er nýjasti kaflinn í langri ofbeldissögu sem sögð er hafa eitrað líf tveggja barna fólksins og valdið þeim miklum skaða.
Á sunnudagskvöld er maðurinn sagður hafa reynt að nauðga konunni á heimili hennar. Þrátt fyrir þá árás synjaði sýslumaðurinn á Egilsstöðum konunni um nálgunarbann. Var því borið við að atvikið væri ekki nógu alvarlegt til að réttlæta nálgunarbann.
Á mánudaginn, þ.e. daginn eftir árásina á sunnudag, er maðurinn sagður hafa orðið sér úti um skotvopn, nokkuð sem vekur mikinn óhug þeirra sem til hans þekkja. Maðurinn býr rétt hjá sveitabæ konunnar sem er enn ískyggilegra. „Hann kom sér fyrir í 300 metra fjarlægð frá henni og fylgist með henni þar. Hann segir að rifflinum sé miðað að húsinu hennar,“ segir aðili sem til þekkir í samtali við DV.
Konan er á fertugsaldri en maðurinn er á sextugsaldri. Fyrir um 15 árum var hann sakfelldur fyrir kynferðisbrot gegn unglingsstúlkum sem dvöldust á vistheimili þar sem hann starfaði. Á undanförnum misserum hefur hann kærður til lögreglu fyrir líkamsárásir á Vopnafirði.
Nánað verður fjallað um málið á næstunni.
