Slagorðið umdeilda er: „Sterk velferð, stolt þjóð.“
Nýtt slagorð Samfylkingarinnar vekur úlfúð – „Eruð þið bara alveg búin að tapa ykkur?“
Jón Viðar Jónsson, einn þekktasti leikhúsgagnrýnandi þjóðarinnar, gerði málið að umtalsefni á Facebook-síðu sinni í gærkvöldi.
„Þó að vígorð stjórnmálaflokka séu nokkuð sem vart tekur því að þrátta um, fær Samfylkingin plús hjá mér fyrir að þora að skarta orðinu ÞJÓÐ. Og að sjálfsögðu rjúka upp rétttrúnaðarseggir sem láta öllum illum látum og vilja helst gera það burtrækt úr tungunni – hvað þá orð eins og ÞJÓÐARSTOLT,“ segir Jón Viðar og bætir við:
„Af því tilefni segi ég aðeins þetta: Við höfum fulla ástæðu til að vera stolt af þjóðerni okkar, stórmerkum menningararfi (sem við ræktum þvi miður alls ekki alltaf sem skyldi), stórbrotinni sögu, glæsilegum og ótrúlega fjölbreyttum bókmenntum og síðast en ekki síst þessu einstæða tungumáli sem forfeður okkar (með dyggri hjálp nokkurra góðviljaðra og mikilhæfra útlendinga) rifu upp úr stöðnun og veiklun gagnvart erlendum málum og gerðu að tæki fullfæru um að tjá veruleika okkar i aðstæðum nútímans. Ég amk veit ekki um jafn fámenna ÞJÓÐ sem getur státað af öðru eins – en sé hún til þá væri gaman að frétta af henni, þó ekki væri nema til að óska henni til hamingju og fullvissa um að hún geti sannarlega borið höfuðið hátt – eins og við eigum alltaf að gera.“
