Viktoria Mukhametova, 24 ára, sýndi engin svipbrigði þegar dómari í Yekaterinburg í Rússlæandi dæmdi hana til 12 og hálfs árs vistar í vinnubúðum. Hún var sakfelld fyrir landráð fyrir að hafa selt teikningar af rússneskum skriðdrekum til Úkraínumanna.

Metro skýrir frá þessu og segir að Viktoria hafi afhent úkraínskum embættismönnum teikningarnar gegn greiðslu upp á sem svarar til um 170.000 íslenskra króna.

Hún starfaði sem vélavörður í skriðdrekaverksmiðjunni Ural sem er í borginni Nizhny Tagil í Sverdlovsk-héraðinu. Þetta er stærsta skriðdrekaverksmiðja í heimi.

Viktoria játaði að hafa selt teikningarnar sem eru sagðar hafa innihaldið tæknilegar upplýsingar um skriðdreka.

Hún og eiginmaður hennar voru handtekin í mars 2023 af leyniþjónustunni FSB.

Eiginmaður hennar, Danil Mukhametov, hefur verið ákærður fyrir svipað brot.