Karen Kjartansdóttir, stjórnendaráðgjafi, bendir á að langstærstur hluti þeirra útlendinga sem fengið hafa mannúðarleyfi komi frá Úkraínu. Spyr hún hvort að Sjálfstæðisflokkurinn ætli að hætta að taka á móti Úkraínumönnum eða erlendu vinnuafli.
„Á fyrstu átta mánuðum ársins 2024 hafa 853 manns frá Úkraínu fengið mannúðarleyfi vegna stríðsástandsins, og 136 einstaklingar frá öðrum löndum, þar á meðal 45 frá Venesúela og 32 frá Palestínu, sem hafa fengið alþjóðlega vernd,“ segir Karen í færslu á samfélagsmiðlum sem fengið hefur talsverða athygli. „Þetta er aðeins örlítið brot af þeim 80.000 erlendu ríkisborgurum sem búa á Íslandi,“ segir hún.
Birtir hún kökumynd sem sýnir glögglega skiptinguna. Það er að 86,2 prósent komi frá Úkraínu, 4,6 prósent frá Venesúela, 3,2 prósent frá Palestínu, 2,2 prósent frá Íran, 2,1 prósent frá Afganistan og 1,6 prósent frá Nígeríu.
„Og því spyr ég, hvað vill Sjálfstæðisflokkurinn eiginlega í útlendingamálum sem liggur svona á?“ spyr Karen. „Ætlar flokkurinn að hætta að taka á móti Úkraínumönnum eða erlendu vinnuafli?“
Segir hún aðalbreytinguna vera komu Úkraínumanna og tímabundinnar viðbótarverndar sem Venesúelabúar fengu og komu því í stórum stíl.
„Rifjum samt upp að Venesúelabúar, sem fengu viðbótarvernd, voru með 86,5% atvinnuþátttöku – hærri en meðal Íslendinga – og greiddu skatta og gjöld,“ segir Karen. „Þegar stjórnvöld sviptu þá verndinni máttu þeir ekki lengur vinna og fóru á opinbera framfærslu. Þetta er ein af helstu ástæðum aukins kostnaðar í útlendingamálum, ekki fjöldi flóttafólks.“
Að lokum spyr hún hvort að Íslendingar vilji stefnu sem geti dregið úr ferðaþjónustu og byggingariðnaði. Þessir geirar séu knúnir áfram af erlendu vinnuafli. „Hvernig mun það hafa áhrif á atvinnulífið og hagvöxt á Íslandi?“ spyr Karen.
