Vinir og fjölskylda hins horfna Henry Alejandro Jiménez Marín söfnuðust saman á nýársdag í spænsku borginni Torrevieja til að þrýsta á rannsókn málsins. Einkaspæjari fjölskyldunnar segir að íslenskur glæpamaður hafi ráðist á Henry rétt áður en hann hvarf.
Fimm ár eru síðan Henry hvarf, á nýársnótt árið 2019. Hann var af kólumbískum ættum en var búsettur á Torrevieja á Spáni og leigði íbúð með íslenskum manni. Partí var í íbúðinni á nýársnótt þar sem kom til átaka og hvarf Henry eftir það.
„Hinir svokölluðu vinir hans sögðu að hann hefði horfið eftir að maður í íbúðinni lamdi hann. Það er sorglegt að eftir allar þær upplýsingar sem við höfum veitt lögreglunni í Pilar de la Horadada að þeir hafi ekkert gert fyrir son minn,“ sagði Gina Marín, móðir hans, við dagblaðið The Leader.
Vinir og fjölskylda Henry mættu með skilti og plaggöt á Plaza de la Constitución torgið í Torrevieja til að minna á hvarf hans og þrýsta á lögregluna. Ekkert hefur miðað áfram í rannsókninni.
„Eftir fimm ár eru einu svörin sem ég fæ frá lögreglunni þau að fyrst það er ekkert lík þá sé enginn glæpur,“ sagði Gina og beygði af. „Lögreglan lítur á það sem sjálfsagðan hlut að sonur minn sé dáinn en þeir segjast ekki geta gert neitt við þann sem lamdi hann. Þeir segja mér að vera ekki að eyða tímanum í að setja upp plaggöt út af syni mínum. En þeir eru búnir að grafa málið ofan í skúffu í Alicante.“
Að sögn Ginu voru fjölmargir viðstaddir í partíinu þegar Henry varð fyrir líkamsárásinni.
„Það voru níu manns að horfa á þegar hann var laminn. Þeir tóku árásina upp á símana sína og svo gleypir jörðin hann? Þessir svokölluðu vinir sem voru þarna, leyfum þeim að snerta hjörtu sín og játa hvað þeir gerðu syni mínum. Þeir hjálpuðu þeim sem lamdi hann,“ sagði Gina.
Sagði hún að það hafi verið ættingjar Henry sem hafi fengið þessa vini til að viðurkenna að árásin hafi átt sér stað. Lögreglan hafi ekki einu sinni hringt í þá.
Fjölskyldan hefur einnig leitað til einkaspæjara til þess að reyna að komast að afdrifum Henry. Hann hefur skaffað lögreglunni upplýsingar um geranda líkamsárásarinnar en svo hefur ekkert meira gerst.
Um sé að ræða Íslending sem eigi sakaferil að baki á Íslandi. Þetta hafi íslenskir blaðamenn sannreynt. Gina sagði að vinirnir hafi sagt að Henry hafi hlaupið burtu eftir líkamsárásina. Hins vegar hafi ekki sést tangur né tetur af Henry í eftirlitsmyndavélakerfum í nágrenninu og enginn séð hann biðja um hjálp.
Nokkrum dögum eftir árásina fór Íslendingurinn aftur heim til Íslands.
„Því miður virkar réttlætið ekki í þessu máli, rannsóknin er lömuð,“ sagði Gina.
