Greint var frá því í gær að RÚV hefði ákveðið að rjúfa tengsl á milli Söngvakeppninnar og þátttöku Íslands í keppninni í vor. Þetta þýðir að undankeppnin, það er sjálf Söngvakeppnin, verður haldin en ákvörðun verði tekin síðar um það hvort Ísland taki þátt í Eurovision eða ekki. Það verði meðal annars gert í samráði við sigurvegara keppninnar.
Mörður skrifaði færslu á Facebook í gærkvöldi þar sem hann segir að þessi ákvörðun hafi verið tekin algerlega án aðkomu stjórnar.
„Þetta er auðvitað win win fyrir stjórnina og stjórnendur. Þetta stórkostlega trix firrir okkur algerlega allri ábyrgð á þessa gríðarlega mikilvægu ákvörðun og þeir sem verða brjálaðir út af niðurstöðunni, hver sem hún verður, munu beina bræði sinni að þessu listafólki en ekki að okkur,“ sagði Mörður í færslu sinni og bætti við:
„Þetta held ég að sé alveg meiriháttar. Ég held að einkunnarorð RÚV ættu að vera þessi: Hugrekki, heilindi, ábyrgð.
Ákvörðunin hefur vakið gríðarlega athygli í netheimum og sitt sýnist hverjum. Fjöldi fólks tjáði sig undir frétt RÚV um málið á Facebook í gær og þar voru ýmis sjónarmið á lofti.
„Sleppum keppninni og látum peningana renna til Grindavíkur,“ sagði einn á meðan annar bætti við: „Heigulsháttur. Segjum okkur alfarið út keppninni!“
