Síðasti McDonalds hamborgarinn sem seldur var á Íslandi er enn þá í góðu ásigkomulagi. Eða allavega lítur hann furðu vel út miðað við fimmtán ára aldur. Franskarnar líka.
„Hann er vel frískur,“ segir Hulda Ruth Ársælsdóttir hjá hótelinu Snotra House í Þykkvabæ í Rangárþingi ytra. En þar er borgarinn geymdur og hafður til sýnis. „Hann hefur ekkert breyst. Hann er geymdur í glerkassa og lítur alveg ferlega flott út,“ segir hún.
Veitingastöðum skyndibitakeðjunnar McDonalds var lokað hér á Íslandi þann 31. október árið 2009. Í staðinn opnaði keðjan Metro þar sem verslanir McDonalds höfðu áður verið.
Maður að nafni Hjörtur Smárason keypti síðasta McDonalds borgarann áður en skellt var í lás, og franskar með. Hann hafði heyrt þá þjóðsögu að þessi vinsæli skyndibiti væri svo fullur af rotvarnarefnum að hann myndi aldrei mygla. Ætlaði hann að láta reyna á það.
Í viðtali við Morgunblaðið árið 2015 sagðist Hjörtur hafa sett borgarann á hillu inn í bílskúr. Svo hætti hann að hugsa um gripinn og gleymdi honum í þrjú ár. Árið 2012 flutti Hjörtur til Danmerkur en þá fann hann borgarann í merkilega góðu ástandi á bílskúrshillunni og ákvað að reyna að finna honum framhaldslíf.
Fór hann með borgarann á Þjóðminjasafnið þar sem borgarinn fékk þó aðeins að dvelja í eitt ár. Því að sérfræðingur frá Danmörku hafi metið það svo að Þjóðminjasafnið mætti ekki geyma lífræna hluti eins og hamborgara og franskar kartöflur.
Hjörtur fékk borgarann aftur og kom honum í fóstur hjá vinafólki sínu sem rak Bus Hostel í Skógarhlíð. Þar var hann hafður til sýnis þar til hann var færður yfir á Snotru.
„Hann er búinn að vera á hjá okkur síðan 2013. Þá var Bus Hostel opnað og hann fór fyrst þangað. Síðan er hann búinn að fylgja okkar gistiheimilum,“ segir Hulda.
Á þessu ári verður borgarinn fimmtán ára gamall. Verður það að teljast afrek í matvælaiðnaði að hafa náð að sigrast svona vel á náttúrulegri rotnun.
Borgarinn hefur vakið heimsathygli og um hann verið fjallað í mörgum af helstu fjölmiðlunum, svo sem breska ríkissjónvarpinu BBC og bandaríska dagblaðinu Washington Post.
Um tíma var hægt að fylgjast með honum í beinu streymi á netinu en sá hlekkur liggur niðri um þessar mundir. Snotra House útvegaði DV hins vegar nýjar myndir af hnossgætinu. Á þeim sést að umbúðirnar eru í verra ásigkomulagi en maturinn.
