„Það gerðu auðvitað fleiri og er ég enn minntur á yfirlýsingar sumra flokksfélaga minna af sama tilefni,“ segir Ásmundur í nokkuð harðorðri grein í Morgunblaðinu í dag. Þar skrifar hann einmitt um hælisleitendur og flóttamenn og segir að ábyrgð fjölmiðla hér á landi sé mikil nú þegar raunveruleikinn kemur aftan að okkur.
Ásmundur segir að „slaufunin“ hafi orðið í kjölfar varnaðarorða hans um óhefta fjölgun hælisleitenda í landinu.
„Þrátt fyrir það var fjöldi þeirra á þeim tíma líklega um þriðjungur þess sem síðar varð. Hann er löngu orðinn óviðráðanlegur fyrir lítið samfélag á Íslandi. Á þeim tíma kallaði ég eftir því að bakgrunnsskoðun færi fram á þeim sem hingað kæmu og að við gættum ýtrustu varna við landamæri landsins.“
Sjá einnig: Birgir vill tjaldbúðirnar burt af Austurvelli:„Þjóðaröryggismál og á ekki að viðgangast“
Ásmundur segir að á þeim tíma – eins og nú – hafi verið vitað að til landsins streyma skipulagðir hópar undir merkjum hælisleitenda til að stunda hér mansal og aðra skipulagða brotastarfsemi.
„Þrátt fyrir viðleitni til að efla landamæraeftirlit og löggæslu dugar það hvergi nærri til. Lögreglan er hundelt í störfum sínum þegar koma á fólki úr landi sem hefur fengið synjun á hælisumsókn á öllum stigum, jafnvel fyrir dómstólum. Þar ganga fremstir í fylkingu vinstrisinnaðir fjölmiðlar, píratar allra flokka og öfgamenn á vinstri vængnum,“ segir Ásmundur sem spyr: „Hverra hagsmuna er verið að gæta?“
Hann rifjar upp nýlegar fréttir frá Danmörku þess efnis að grunur væri uppi um undirbúning hryðjuverka þar í landi sem tengdust Hamas-hryðjuverkasamtökunum.
„Dómsmálaráðherra Danmerkur, Peter Hummelgaard, segir hin meintu tengsl einstaklinga, sem danska lögreglan handtók nýlega, við Hamas staðfesta alvarlega hryðjuverkaógn gagnvart Danmörku. Af þessum ástæðum er hryðjuverkaógn metin alvarleg í Danmörku.“
Ásmundur bendir svo á að við Alþingi Íslendinga hafi hópur Palestínumanna komið sér fyrir í tjaldbúðum.
„Vegna myndbirtinga þeirra sjálfra og íslenskra stuðningsmanna er auðvelt að fletta upp viðkomandi einstaklingum á samfélagsmiðlum. Við þá yfirferð dúkkar ýmislegt upp sem vekur mikinn óhug, m.a. afdráttarlaus stuðningur við Hamas-hryðjuverkasamtökin, myndir af svokölluðum píslarvottum, viðkomandi með hríðskotavopn í fanginu. Þar að auki ýmis óhugnanlegur stríðsboðskapur og hatursorðræða. Þetta er sem sagt að finna í hópi tjaldbúanna sem studdir eru af þingmönnum Pírata, pírötunum í Viðreisn og Samfylkingunni. Sömu þingmenn berjast gegn auknum valdheimildum og rannsóknarheimildum lögreglunnar. Þá erum við að tala um að taka upp sömu valdheimildir lögreglu og önnur norræn lönd búa við. Ekkert umfram það,“ segir Ásmundur í grein sinni.
Spyr hann hvort það sé mögulega svo að þessir þingmenn vilji ekki gera allt sem í valdi Alþingis stendur til að koma í veg fyrir skipulagða glæpastarfsemi og mansal í landinu. Veltir hann fyrir sér hverra hagsmuna þeir eru að gæta.
„Þetta er fólkið sem er í liði með Reykjavíkurborg sem skýtur skjólshúsi yfir og sendir einkennileg skilaboð til þjóðarinnar um vanvirðingu við Austurvöll og nágrenni hans. Austurvöll sem geymir styttuna af Jóni forseta, Dómkirkjuna og Alþingishúsið. Hér má ekki gleyma þætti vinstrisinnaðra fjölmiðla sem flytja daglegar fréttir úr búðunum á Austurvelli, en birta ekki upplýsingar um einstaklinga sem þar halda til. Er þeim þó í lófa lagið að afla sér slíkra upplýsinga,“ segir Ásmundur sem er þeirrar skoðunar að Ríkisútvarpið og aðrir vinstrisinnaðir fjölmiðlar stjórni umræðunni í landinu.
„Meðal annars með því að slaufa einstaklingum sem ekki eru í náðinni en hafa frá upphafi kallað eftir vandaðri vinnubrögðum og varkárni í útlendingamálum. Á dögunum var hælisleitanda, sem er talinn vera liðsmaður ÍSIS, vísað úr landi. Ábyrgð fjölmiðla er mikil nú þegar raunveruleikinn kemur aftan að okkur. Vonandi líta þeir til nágrannalanda okkar og láta af þöggun og ófrægingarherferðum í garð þeirra sem er sannarlega annt um íslenskt samfélag. Vonandi er það ekki um seinan.“
