Sverrir Einar Eiríksson, sem meðal annars rekur Hótel Brim við Skipholt, birti myndband af innrás tveggja manna inn á hótelið og íkveikjutilraun. Hann heitir jafnframt 100 þúsund krónum til þeirra sem gætu upplýst hann um hvaða menn eru að verki:

„Sunnudaginn 14 janúar kl 7:14 þá mættu þessir aðilar í Skipholt 27, 105 Reykjavík og sáu ástæðu til þess að mölva rúðu og reyna að kveikja í. Sem betur fer varð lítill skaði, brotin rúða og smá brunablettur á bók.

Ég óska eftir upplýsingum um hvaða aðilar voru að verki, 100.000 kr fundarlaun í boði fyrir þá sem getur með óyggjandi hætti bent mér á báða aðilana.“

Er DV leitaði til Sverris um frekari upplýsingar sendi hann miðlinum yfirlýsingu vegna málsins. Þar kemur fram að málið tengist árekstrum manna við dyraverði sem Sverrir hefur nýtt sér þjónustu hjá, í tengslum við rekstur skemmtistaða sinna í miðborginni, Exit og B5.

Sverrir segir í yfirýsingu sinni:

„Ég leitaði til lögreglu vegna skemmdarverka og hótana frá einhverju strákagengi sem komist hafði upp á kant við dyraverði hjá fyrirtæki sem leigir út dyravörslu til skemmtistaða fyrir um hálfum mánuði. Strákarnir eru ekki klárari en svo að þeir hafa beint reiði sinni að mér. Síðan þetta gerðist hef ég látið af viðskiptum við þetta dyravarðafyrirtæki og hafði vonast til þess að laganna verðir myndu bregðast skjótt við til að tryggja öryggi fólks gegn þessum drengjum sem í fávisku sinni virðast til alls vísir. Eftirgrennslan lögreglu hefur hins vegar engu skilað og ekki að sjá að rannsókn málsins gangi nokkuð. Þess vegna ákvað ég að birta sjálfur þetta myndband í von um að hafa uppi á þessum pörupiltum. Á myndbandinu sést tilraun til íkveikju á hóteli sem ég rek sem gerð var núna á sunnudagsmorguninn. Þetta er að sjálfsögðu stóralvarlegur glæpur. Betur fór en á horfðist og skaði sem betur fer lítill. Til að tryggja eigið öryggi og viðskiptavina minn hef ég líka ráðið öryggisfyrirtæki til að sinna gæslu og finna þessa drengi til að tryggja að svona lagað endurtaki sig ekki.“