Þetta kemur fram í viðtali við Magnús Tuma sem birtist í nýjasta tölublaði Víkurfrétta.
Grindvíkingum var gert að yfirgefa heimili sín í kjölfarið en sumir hafa viljað meina að það hafi verið gas en ekki kvika sem myndaði ganginn. Magnús Tumi útskýrir þetta í viðtalinu.
Hann segir að mælingar sýni mikla gliðnun undir í Grindavík sem gerðist að mestu 10. nóvember.
Bætir hann við að eitthvað hafi farið inn í þetta rými, annað hvort gas eða kvika. Ef um gas hefði verið að ræða hefði þurft að vera á því mikill þrýstingur.
„Ef ekki, hefði kvikan sem þarna kom upp og fyllti sprunguna norðar [frá Hagafelli og norður fyrir Stóra-Skógfell] fossað með gríðarlegum látum inn í rýmið, því það eina sem hefði haldið aftur af henni hefði verið mjög mikill mótþrýstingur gassins,“ segir Magnús í viðtalinu.
„En segjum samt að þarna hafi gas verið á ferðinni. Þá er útilokað að það væri þarna ennþá því þakið yfir er brotið og lekt svo gasið hefði streymt upp. Ekkert af þessu gerðist, sem þýðir að eingöngu kvika getur verið skýringin. Það er líka í takt við allt það sem jarðfræðin sýnir okkur í rofnum stafla, hvergi finnast merki um „gashólf“. Ef þetta var kvika, þá gengur allt upp. Þá fossaði kvikan suður og fyllti upp í rýmið sem myndaðist. Hún er þar ennþá, en að mestu storknuð.“
Nánar er fjallað um málið á vef Víkurfrétta.
