Guðbrandur skrifar grein á Vísi hann gagnrýnir ríkisstjórnina fyrir aðgerðaleysi í málefnum Grindvíkinga.
Á sama tíma og ráðherrar í ríkisstjórninni þræta og hluti þeirra bíður og vonast eftir vantrauststillögu stjórnarandstöðunnar á matvælaráðherra þurfi önnur mikilvæg mál að bíða.
„Eitt af þeim málum sem hafa setið á hakanum meðan á rifrildinu stendur er úrlausn fyrir þá Grindvíkinga sem eru með lán hjá lífeyrissjóðum. Þeir hafa ekki notið sömu niðurfellingar og bankarnir hafa veitt,“ segir hann.
Bendir hann á að lífeyrissjóðirnir hafi lýst því yfir að lög kveði á um að heimild þeirra til þess að fella niður afborganir lána sé ekki fyrir hendi. Því verði að grípa til annarra ráða til þess að lántakendur hjá lífeyrissjóðunum sitji við sama borð og aðrir.
„Samkvæmt upplýsingum frá formanni Verkalýðsfélags Grindavíkur eru u.þ.b. 100 Grindvíkingar í þessari stöðu og upphæðin gæti numið 60-70 milljónum fyrir þá þrjá mánuði sem þessi aðgerð átti að ná yfir í fyrstu atrennu,“ segir hann og bendir á að í stóra samhenginu séu þetta smáaurar þegar ljóst er að tjónið í Grindavík nemur nú þegar tugum milljarða.
„Úr því að ríkisstjórnin ætlar sér að eyða tíma sínum í að rífast innbyrðis verður að koma til önnur leið. Ég mun því hafa forgöngu um ásamt minnihluta velferðarnefndar að nefndin leggi fram tillögu um að ríkissjóður taki þennan kostnað á sig. Ríkisstjórnin getur þá haldið áfram að rífast á meðan í friði.“
