Gangandi vegfarandi lést þegar ekið var á hann á gatnamótum Sæbrautar og Kleppsmýrarvegar skömmu eftir miðnætti. RÚV greinir frá þessu.

Sæbraut var lokað til beggja átta frá Vesturlandsvegi að Holtavegi í um það bil tvær klukkustundir meðan viðbragðsaðilar voru að störfum á vettvangi. Lögregla hefur greint frá því að vegfarendur hafi tekið lokuninni illa og sýnt störfum lögreglu á vettvangi lítinn skilning.

„Lögregla minnir á að ávallt er góð ástæða fyrir lokunum lögreglu, en þær eru bæði til að tryggja vettvanginn í tengslum við rannsóknarhagsmuni auk þess að tryggja öryggi viðbragðsaðila sem starfa innan lokana,“ segir í dagbók lögreglu af þessu tilefni.

Uppfært kl. 11:35:

Lögreglan á höfuðborgarsvæðinu hefur birt eftirfarandi tilkynningu um málið:

„Banaslys varð á Sæbraut í Reykjavík í nótt, en þar var fólksbifreið ekið norður Sæbraut, á milli Súðarvogs og Kleppsmýrarvegar, og á gangandi vegfaranda sem var á leið yfir götuna til  austurs. Tilkynning um slysið barst tíu mínútum eftir miðnætti og héldu viðbragðsaðilar strax á vettvang, en því miður var vegfarandinn látinn er að var komið.

Lokað var fyrir umferð um vettvanginn á meðan unnið var að rannsókn málsins, líkt og venjan er þegar svo alvarlegt slys hefur átt sér stað, og mætti það litlum skilningi annarra vegfaranda. Lögreglumenn eru ýmsu vanir í þeim efnum, en framkoma sumra í nótt var dapurleg svo ekki sé meira sagt og er fólk beðið um að taka þetta til sérstakrar umhugsunar.

Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins. Vitni að slysinu, eða aðdraganda þess, eru beðin um að hafa samband við lögreglu. Upplýsingum má koma á framfæri í tölvupósti á netfangið abending@lrh.is eða í síma 444 1000.“