Á fundi borgarráðs Reykjavíkur í gær var tekið fyrir bréf Einars Þorsteinssonar vegna fyrirhugaðar ferðar hans í embættiserindum til borgarinnar Seattle á vesturströnd Bandaríkjanna. Fulltrúar Sjálfstæðisflokksins gagnrýndu að ekki lægi fyrir hver kostnaður við ferðina verður. Fulltrúar meirihlutaflokkanna svöruðu því til að upplýsingar um kostnaðinn myndu verða lagðar fram þegar þær lægju fyrir en hann verður greiddur af Íslandsstofu.
Í bréfi borgarstjóra til borgarráðs kemur fram að ásamt honum fari aðstoðarmaður hans, Björg Magnúsdóttir, í ferðina til Seattle sem mun standa dagana 1.–5. október næstkomandi. Tilgangur ferðarinnar er að taka þátt í menningarhátíðinni Taste of Iceland sem haldin hefur verið með í völdum borgum í Norður Ameríku í meira en tvo áratugi sem hluti af markaðsverkefninu Iceland Naturally, og síðar Inspired by Iceland –North America.
Í bréfinu er minnt á að Seattle sé systurborg Reykjavíkur og tengslin milli borganna sterk. Ferðin sé kostuð af Íslandsstofu.
Starfsemi Íslandsstofu er fjármögnuð einkum með svokölluðu markaðsgjaldi sem lagt er á fyrirtæki og rennur í ríkissjóð og þaðan til Íslandsstofu.
Um dagskrá hátíðarinnar segir í bréfi borgarstjórans að hún sé skipulögð í samstarfi við kynningarmiðstöðvar lista og skapandi
greina, þar sem teflt sé fram upprennandi íslensku listafólki á sviði tónlistar, bókmennta, kvikmynda og hönnunar. Dagskráin sé miðuð að áhugasömum neytendum en sé jafnframt hugsuð til þess að skapa umfjöllun fjölmiðla í Seattle og Bandaríkjunum í þeim tilgangi að auka vitund um Ísland sem áfangastað, en ekki síður sem upprunalands áhugaverðrar menningar og matvæla í hæsta gæðaflokki. Borgarstjórinn segir enn fremur í bréfinu að hann mun taka þátt í fjölbreyttum viðburðum og muni veita fjölmiðlum á svæðinu viðtöl.
Dagskrá hátíðarinnar fylgir með bréfinu. Einar borgarstjóri mun hefja sína þátttöku að morgni 2. október, að staðartíma. Þá mun hann vera til viðtals í morgunþætti sjónvarpsstöðvarinna KING5 en í dagskránni kemur fram að í þeim hluta þáttarins þar sem Einar verður til viðtals muni einnig koma fyrir hjól með verðlaunum (e. Wheel of Prizes) og að skálað verði í Reyka vodka, sem eimað er á Íslandi.
Einar mun síðan ávarpa viðburði sem haldnir verða í kynningarskyni fyrir fjölmiðla þar sem meðal íslenskir tónlistarmenn og matreiðslumenn koma fram. Hann mun einnig opna sýningu þar sem íslensk hönnun kemur fyrir. Hann verður einnig viðstaddur viðburðinn Taste of Iceland: How Words Shape a City í National Nordic Museum í borginni en þar verða sömuleiðis rithöfundarnir Ragnar Jónasson og Yrsa Sigurðardóttir.
