Ungir Píratar eru ósammála Andrési Inga Jónssyni, þingmanni flokksins, um að auglýsingabann á jarðefnaeldsneyti sé rétta leiðin til að takast á við loftslagsbreytingar. Ályktaði stjórn ungliðahreyfingarinnar gegn þingsályktunartillögu Andrésar.
Auk Andrésar Inga standa fjórir þingmenn Vinstri grænna að þingsályktunartillögunni. Þau Eva Dögg Davíðsdóttir, Steinunn Þóra Árnadóttir, Orri Páll Jóhannsson og Jódís Skúladóttir. Samkvæmt henni er menningar og viðskiptaráðherra falið að leggja fram frumvarp þar sem lagt yrði bann við auglýsingum á jarðefnaeldsneyti og vörum því tengdu.
„Markaðssetning jarðefnaeldsneytis er ekki ósvipuð því sem tóbaksiðnaðurinn stundaði svo áratugum skipti – að hylma yfir skaðsemi vöru sem veldur óbætanlegu tjóni,“ segir í greinargerð þingmannanna fimm og bent er á að víða hafi verið lagt bann á auglýsingar tóbaks. „Því er ekki aðeins réttlætanlegt heldur nauðsynlegt að beita svipaðri aðferðafræði og beitt var gegn tóbaksnotkun til að draga úr olíunotkun.“
Þessu eru Ungir Píratar ekki sammála og ályktaði stjórn þeirra gegn þingsályktunartillögunni. Það er að tillagan sé bæði ólíkleg til að skila árangri og hún sé í ósamræmi við grunnstefnu Pírata.
„Tillagan er ekki til þess fallin að taka á þeim vanda sem loftslagsbreytingar eru. Í stað þess að leysa vandann, er hún fremur til þess fallin að snúa almenningi frá viðbrögðum við vánni,“ segir í ályktuninni.
Í stað þess að boða til hvetjandi aðgerða fyrir stórfyrirtæki sem bjóða upp á umrædda og mengandi þjónustu að skipta yfir í græna og sjálfbæra orkugjafa er málið nálgast með bannstefnu.
„Lausnin er ekki að torvelda almenningi aðgengi að umræddum vörum, heldur breyta kerfinu, samgönguvenjum og neysluþörfum með kerfislægri uppbyggingu innviða og hvatamiðaðra aðgerða,“ segja ungliðarnir.
Segjast Ungir Píratar fagna skoðunum á öllum mögulegum leiðum til að gera samfélagið og hagkerfið sjálfbærra. Ekki síst þegar kemur að því að draga úr neyslu ósjálfbærra orkugjafa eins og jarðefnaeldsneytis. Málið sé hins vegar tæklað frá rangri hlið.
„Ungir Píratar vilja frekar sjá auglýsingar tengdar jarðefnaeldsneyti sólsetrast þegar þær verða tímanlega óþarfar, heldur en að sjá þær bannaðar af hendi ríkisins,“ segir í ályktuninni. „Að láta auglýsingar tengdar jarðefnaeldsneyti hverfa frá sjón neytenda finnst Ungum Pírötum ólíklegt að muni draga mælanlega úr neyslu eldsneytis, endar er eftirspurnin eftir eldsneyti mun óteygjanlegri en eftirspurn eftir til dæmis tóbaki. Bannið væri líklegra til að draga úr upplifun fólks af þeim raunveruleika um neyslu jarðefnaeldsneyta sem blasir við okkur.“
