Hinn erlendi ferðamaður sem lést í bílslysinu við Fossá, norðan við Skagaströnd, í gær var lögreglumaður frá Hong Kong. Farþeginn sem slasaðist alvarlega í slysinu var eiginkona hans, lögreglumaður hjá hafnarstjórn í borgarinnar.
Frá þessu er greint í kínverska miðlinum South China Morning Post.
Lögreglan á Norðurlandi vestra tilkynnti um alvarlegt slys við Fossá á Skaga á fjórða tímanum í gær. Viðbragðsaðilar væru að verki á staðnum og að veginum hefði verið lokað.
Seinna var greint frá því að bíll hefði oltið og hafnað utan vegar. Um klukkan 21 var greint frá því að um banaslys væri að ræða. Ökumaðurinn hefði látist en farþeginn verið fluttur á Sjúkrahúsið á Akureyri til aðhlynningar. Hinn látni væri á fertugsaldri.
Rannsóknarnefnd samgönguslysa kom á vettvang en rannsókn slyssins er í höndum lögreglu.
Samkvæmt South China Morning Post voru hjónin með bílinn á leigu. Frekari upplýsingar koma ekki fram.