Fjallað var um mál 28 ára flugmanns hjá Icelandair, Sólons Guðmundssonar, í fréttum Stöðvar 2 á föstudag en hann féll fyrir eigin hendi í lok ágúst eftir að mál honum tengd voru tekin fyrir hjá Icelandair.
Kom fram að fjölskylda hans vildi að lögreglurannsókn færi fram á andláti hans, en fjölskyldan og talskona hennar, Hödd Vilhjálmsdóttir almannatengill, fullyrtu að Sólon hefði verið lagður í einelti af tveimur samstarfskonum vegna sambands hans við aðra þeirra. Honum hafi verið sagt upp störfum vegna ásakana í hans garð en Icelandair hafi neitað að upplýsa hann um hverjar ásakanirnar væru.
Í yfirlýsingu sem Vilhjálmur sendi Vísi og mbl.is kemur fram að fimm konur hafi upplýst Icelandair um ofbeldi, andlegt eða líkamlegt eða hvoru tveggja, sem þær töldu sig hafa orðið fyrir. Ein kvennanna lagði svo fram kæru sem fyrr greinir.
Í frétt Vísis sem unnin er upp úr yfirlýsingu Vilhjálms kemur fram að atvikið sem nær til nauðgunarákvæðisins hafi átt sér stað í lok júlí á þessu ári. Í beinu framhaldi hafi konan leitað til sálfræðings sem sendi hana á neyðarmóttöku fyrir þolendur kynferðisofbeldis. Konan hafi svo upplýst Icelandair um meint brot og stuttu síðar lagt fram kæru.
Hödd, talskona fjölskyldunnar, var ómyrk í máli á Facebook eftir að fjallað var um málið á föstudag. Sagði hún að mál Sólons væri dæmi um að hin svokallaða MeToo-bylting hefði étið börnin sín.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
