Foreldrasamtök gegn áfengisauglýsingum hafa kært verslunina Hagkaup til lögreglu vegna opnunar netverslunar með áfengi. Fulltrúar samtakanna funduðu einnig með þingmönnum stjórnskipunar og eftirlitsnefndar í dag.
Hagkaup opnaði netverslun með áfengi fyrir tæpri viku, fimmtudaginn 12. september. Að sögn verslunarinnar hefur salan farið vel af stað og um tíma hrundi áfengissöluvefurinn.
Opnunin hefur mætt mikilli andstöðu lýðheilsu og forvarnarþenkjandi fólks sem segja hana lögbrot. Tveimur dögum eftir opnunina kærðu Foreldrasamtök gegn áfengisauglýsingum Hagkaup til Lögreglunnar á höfuðborgarsvæðinu.
„Þetta var hefðbundin ábending um að þarna færi fram ólögleg áfengissala,“ segir Árni Guðmundsson, formaður samtakanna. Kæran var send í gegnum ábendingavef lögreglunnar. Fékk Árni strax svar um að ábendingin væri móttekin og að málið færi í farveg.
Um miðjan ágúst var greint frá því að langvinn lögreglurannsókn gegn þremur aðilum sem selt hafa áfengi á netinu sé á lokastigi. Fljótlega yrði málið sent til ákærusviðs. Árni segir að málið gegn Hagkaupum ætti ekki að taka svo langan tíma í rannsókn.
„Hin málin eru í ferli. Það ætti ekki að fara mikil vinna í að rannsaka sambærileg brot og eru í kæruferli. Þetta lýtur allt að 10. grein áfengislaga. Það væri undarlegt ef það tæki fjögur ár að rannsaka Hagkaup. Þetta eru jafn flókin brot og einföld umferðarlagabrot,“ segir Árni. Segist hann ekki eiga von á öðru en að lögreglan bretti upp ermarnar og klári þetta mál strax.
Foreldrasamtökin létu ekki þar við sitja. Funduðu þau með fulltrúum stjórnskipunar og eftirlitsnefndar Alþingis í dag. Skriflega var óskað eftir því í mars að nefndin tæki netsölu einkafyrirtækja á áfengi til skoðunar. En samtökin hafa verið í svokallaðri breiðfylkingu heilbrigðis og forvarnarstétta í þessari baráttu. Það er með Félagi íslenskra hjúkrunarfræðinga, Læknafélagi Íslands, SÁÁ, Sjúkraliðafélagi Íslands og mörgum öðrum félögum.
Í punktum fyrir fundinn, sem birtir eru á heimasíðu Foreldrasamtaka gegn áfengisauglýsingum, segir meðal annars að bæði fjármálaráðherra og dómsmálaráðherra hafi í fjölmörg ár vanrækt skyldu sína. Sem fjármálaráðherra hafi Bjarni Benediktsson stöðvað málarekstur ÁTVR gegn einkaaðilum og því ekki fengist efnisleg niðurstaða í málin. Fleiri yfirvöld hafi einnig brugðist í málinu.
„ÁTVR kærði netsölur 16. júní 2020. Síðan eru liðin á fimmta ár. Eftir eftirrekstur brást Ríkissaksóknari loks við og er farinn að spyrja lögreglustjórann á höfuðborgarsvæðinu hvenær ljúka eigi málinu. Nú hefur komið fram opinberlega að tvö netsölumál eru fullrannsökuð og komin til ákærusvið. Því skal skotið að hér að þrátt fyrir þetta ákveður Hagkaup að hefja áfengissölu, vitandi að kæra ÁTVR er komin á ákærusvið lögreglunnar á höfuðborgarsvæðinu og það styttist vonandi í niðurstöðu þar,“ segir á vef samtakanna. „Við gefum lögreglunni á höfuðborgarsvæðinu, sem hefur ekki komist að niðurstöðu í á fimmta ár, falleinkunn í þessu máli. Að okkar mati er ekki hægt að útskýra þennan rannsóknartíma. Kannski hefði mátt útskýra nokkra mánuði, tæpast ár. En þessi tími er algerlega óeðlilegur.“
