Lögmaðurinn Ingvar Smári Birgisson segir viðbrögð Helga Magnúsar Gunnarssonar, vararíkissaksóknara, sitja í sér eftir ákvörðun Guðrúnar Hafsteinsdóttur, dómsmálaráðherra, um að hann myndi halda starfinu. Embættismenn eigi ekki að hafa sama tjáningarfrelsi og aðrir.
Ingvar Smári, sem er fyrrverandi aðstoðarmaður dómsmálaráðherrans Jóns Gunnarssonar, segir í færslu á samfélagsmiðlum að hann sé sammála ákvörðun Guðrúnar. Augljóst hafi verið að hún hafi ekki getað tekið neina aðra ákvörðun án þess að stíga á jarðsprengju í leiðinni.
Þá segir hann að fólk eigi að tempra væntingar sínar hvað varðar tíman sem það tók fyrir ráðherra að taka ákvörðunina. Eðlilegur afgreiðslutími sé 2 til 4 vikur og miklir hagsmunir séu undir.
Guðrún ákvað að verða ekki við beiðni Sigríðar Friðjónsdóttur ríkissaksóknara um að veita Helga Magnúsi tímabundið lausn frá störfum sínum vegna ummæla um útlendinga. Að mati Guðrúnar voru ummæli hans óviðeigandi en horfa hafi þurft til þess að þau hafi verið látin falla við sérstakar aðstæður, það er hótanir í hans garð og fjölskyldu hans.
Helgi Magnús fagnaði ákvörðuninni og sagðist stoltur að hafa staðið með sér og tjáningarfrelsinu. Hann sagðist hins vegar ekki ánægður með rökstuðning Guðrúnar.
„En það er eitt í viðbrögðum Helga Magnúsar í dag sem situr í mér og þó styð ég tjáningarfrelsi eins mikið og menn geta gert. Hann virðist upplifa það sem hluta af sínu tjáningarfrelsi að litlar sem engar hömlur fylgi æviskipun sinni sem vararíkissaksóknari. Hann sé í raun bara í sömu stöðu og við hin, sem erum ekki æðstu handhafar ákæruvalds. Því fer fjarri,“ segir Ingvar Smári.
Segir Ingvar Smári því algjörlega ósammála að æviráðnir embættismenn eins og dómarar, ríkissaksóknarar og vararíkissaksóknarar eig að hafa sama tjáningarfrelsi og aðrir borgarar.
„Þarna er um að ræða fólk sem hefur fengið æviráðningu og svo gott sem helgað sig því að vera faglegir embættismenn, hverra hlutleysi þarf að vera algjört,“ segir Ingvar Smári. „Sumum störfum fylgja fórnir og það er óþarfi að fara í einhvern feluleik með það. Það er jafn mikilvægt að þessir einstaklingar séu hlutlausir eins og að þeir líti út fyrir að vera hlutlausir. Allt annað grefur til lengri tíma undan dóms- og réttarkerfinu.“
Nefnir hann sem dæmi að ef dómarar væru ítreka að skrifa skoðanapistla og kasta fram sleggjudómum á Facebook um málefni líðandi stundar. Það myndi eðlilega valda miklu havaríi.
„Það er mjög eðlileg krafa að æðstu embættismenn þjóðarinnar sem eru æviráðnir og gegna gríðarlega mikilvægum embættum hagi sér með ákveðnum hætti,“ segir Ingvar Smári. „Við gerum meiri kröfur til þessa fólks því að orð þeirra og aðgerðir endurspegla kerfið í heild sinni, kerfi sem er hornsteinn í þjóðskipulaginu okkar.“
