Foreldrum í Kópavogi er brugðið vegna fullorðins manns sem hefur sést kenna börnum, sumum mjög ungum glímubrögð og skylmingar nálægt Hamraborg. Lögreglan hyggst hafa uppi á manninum.

„Þetta er eitthvað sem við verðum að skoða og hafa uppi á þessum manni og ræða við hann. Þetta er mjög skringileg hegðun,“ segir Gunnar Hilmarsson, aðalvarðstjóri á lögreglustöðinni í Kópavogi.

Lögreglan hefur ekki fengið tilkynningar um manninn en hefur séð myndbönd af athæfi hans sem hefur verið deilt í hverfagrúbbur í Kópavogi. Gunnar segir það ekki í lagi að fullorðinn maður kenni börnum fangbrögð og skylmingar úti á götu.

Með kylfur og hníf í pokanum

Maðurinn, sem er af erlendu bergi brotinn, heldur úti TikTok síðu þar sem hann birtir myndbönd. Einnig hafa vegfarendur náð ljósmyndum af því þegar hann hefur verið að kenna fangbrögð.

Sést maðurinn, sem er mjög kraftalega vaxinn, meðal annars taka unglingspilt taki aftan á hálsinn og rífa hann niður í götuna og sýna ógnandi stöðu með hnefanum.

Á þetta horfa mun yngri krakkar, sem allir eru með einhvers konar sverð eða prik.

Í öðrum myndbandi sést hann úti á götu með bakpoka og sýna hvað sé í honum. Þar er meðal annars tvær kylfur og hnífur.

Foreldrar óttaslegnir

Eins og gefur að skilja hefur málið vakið ótta hjá foreldrum í hverfinu og hafa myndbönd og myndir af þessu verið birt í hverfagrúbbum.

„Mèr finnst ástæða til að biðla til foreldra barna, sem stunda það að fara á ærslabelginn við Bókasafn Kópavogs, að ræða við börnin um að láta vita þegar þessi maður er á svæðinu,“ segir einn íbúi. „Þykir það algjörlega fyrir neðan allar hellur að hann sè að mæta með „sverð“, hnífa og hvaðeina og sýna og kenna börnum án þess að foreldrar sèu viðstaddir. Ekki síst í ljósi nýliðinna atburða og aukinnar tíðni vopnaburðar á meðal barna/ungmenna.“

„Það er bara ekkert eðlilegt við það að maður úti í bæ sé að kenna börnunum okkar sjálfsvörn með kylfum,geislasverðum og hnífum. Sjálfsvörn ætti að vera kennd af fagaðilum sérstaklega þegar verið er að kenna börnum,“ segir ein kona. „Að auki sýnist mér hann vera með vodka pela í töskunni sem gerir málið enn alvarlegra. Börnin okkar eiga að geta leikið sér örugg á einu vinsælasta leiksvæði Kársness.“