David Cohen, aðstoðarforstjóri bandarísku leyniþjónustunnar, CIA, segir að mennirnir sem ætluðu að ráðast á tónleikagesti Taylor Swift í Vínarborg í Austurríki fyrr í þessum mánuði hafi ætlað sér að drepa „mörg þúsund“ manns.

Cohen segir að CIA hafi átt sinn þátt í að koma í veg fyrir árásina og upplýst austurrísk stjórnvöld um fjóra einstaklinga sem voru að undirbúa hryðjuverk. Mennirnir voru handteknir en þeir eru taldir tengjast ISIS-hryðjuverkasamtökunum.

David Cohen hélt erindi á ráðstefnu um þjóðaröryggi í Maryland í gær þar sem hann fór yfir málið. „Þeir ætluðu sér að drepa tugþúsundir, þar á meðal marga Bandaríkjamenn,“ sagði hann og bætti við að efni til sprengjugerðar hafi fundist í fórum hinna handteknu. Þá hefðu einhverjir þeirra haft beinan aðgang að leikvanginum.

Taylor Swift átti að halda þrenna tónleika á Ernst Happel-leikvangnum í Vínarborg frá 8. til 10. ágúst sem 200 þúsund manns höfðu tryggt sér miða á. Tónleikunum var aflýst eftir handtökurnar.

Austurrísk yfirvöld handtóku tvo einstaklinga þann 7. ágúst síðastliðinn og fleiri handtökur fóru svo fram dagana á eftir. Cohen vildi ekki fara nánar út í það hvernig CIA fékk upplýsingar um yfirvofandi árás.

Þrír hafa verið handteknir í tengslum við málið, þar á meðal hinn 19 ára gamli Beran A sem hafði lýst yfir stuðningi við ISIS. Hann er talinn vera höfuðpaurinn í málinu. Hinir tveir eru 17 og 18 ára, annar þeirra fæddur í Austurríki en hinn í Írak. Efni til sprengjugerðar fannst í kofa í garði við heimili foreldra Berans.