Að sögn lögreglu barst tilkynningin rétt fyrir klukkan 23 í gærkvöldi og voru ungu mennirnir sagðir hafa beitt annað ungmenni hótun um ofbeldi og ógnað með hníf.
Í skeyti lögreglu kemur fram að ungu mennirnir, sem báðir eru undir 18 ára, hafi komist yfir verðmæti. Þeir voru aftur á móti handteknir skömmu eftir miðnætti og að höfðu samráði við barnavernd voru þeir vistaðir í fangageymslu í þágu rannsóknar málsins.
Þá hafði lögregla afskipti af ungmennum í gærkvöldi sem voru að brjóta sér leið inn í yfirgefið húsnæði. Börnin voru treg til að gefa upp nafn og kennitölu og voru þau þar af leiðandi flutt á lögreglustöð. Foreldrum og barnavernd var að lokum gert viðvart um málið og við leit á einu ungmennanna fannst hnífur og verður viðkomandi kærður fyrir vopnalagabrot.
Í skeyti lögreglu kemur einnig fram að óskað hafi verið eftir lögreglu vegna konu sem var að betla. Sá hafði haft í frammi ógnandi tilburði við tilkynnanda. Konan var farin af vettvangi þegar lögregla kom á staðinn.