Andrea Björk Hannesdóttir, dýralæknir, hvetur veiðimenn til þess að passa upp á öngla og önnur veiðafæri sem geta valdið dýrum tjóni eftir sára reynslu. „Yndislegur göngutúr í góða veðrinu varð að martröð,“ segir Andrea í færslu á Facebook-síðu sinni, sem vakið hefur mikla athygli. Forsagan er sú að Andrea skellti sér í göngutúr við Kleifarvatn ásamt hundinum sínum Smára sem skyndilega rann á einhverja ljúfa lykt. Um var að ræða beitu með öngli og áður en Andrea gat brugðist við hafði Smári gleypt góssið sem endaði með því öngullinn festist í tungu hans. Í færslunni vekur Andrea athygli á hættunni segist hún aldrei hafa lent í öðru eins eftir ótal marga göngutúra um vatnið fallega.
Þrátt fyrir að hundurinn hafi upplifað miklar þjáningar út af önglinum í tungunni þá segir Andrea í færslunni að í raun hefði getað farið miklu verr.
„Sem betur fer festist öngullinn þarna en ekki neðar í vélinda eða niðri í maga því þá hefði hann þurft á skurðaðgerð að halda sem er mikið hættumeira! Sem betur fer á hann mömmu sem er dýralæknir og gat strax brunað á bókstaflega næstu dýralæknastöð og deyft hann strax niður til að hjálpa honum. Sem betur eigum við ótrúlega góða að, en ein símhringing og María var tilbúin að taka á móti okkur með vírklippur á dýralæknamiðstöðinni þegar við komum á staðinn. Smá panikk á því hvernig í ósköpunum maður nær svona úr honum (já maður kannski hugsar ekki alveg 100% skýrt þegar þetta er manns eigið dýr) en ég hringdi bara í pabba sem er læknir og hefur lent í þessu sama á vaktinni í gamla daga bara með veiðimann með öngul fastann í tungu. Hann gat leiðbeint mér hvernig væri best að gera í gegnum facetime,“ skrifar Andrea Björk í færslunni.
Þá hafi tilviljun ein ráðið því að Smári var sá sem lenti í óhappinu en ekki tvær tíkur sem einnig voru með í för. Helga, sem er 15 ára gömul og glímir við veikindi, og hin hvolpafulla Sunna. Svæfing hefði getað valdið þeim alvarlegu tjóni.
Áréttar Andrea Björk að veiðimenn sýni ekki slíkt kæruleysi enda geta mörg önnur dýr en hundar skaðast af veiðarfærum sem að skilin eru eftir. „Viljið þið vinsamlegast kæru veiðimenn, passa í framtíðinni að taka með ykkur alla öngla, beitur, flotholt og snæri aftur heim. Látum þetta vera lexíuna svo þetta gerist aldrei aftur og jafnvel hafi hörmulegri örlög!,“ skrifar Andrea.