Nú eru Úkraínumenn skyndilega komnir í þá stöðu að vera hersetulið í öðru ríki og því fylgja nýjar áskoranir og ábyrgð. Það eru almennir borgarar sem þeir þurfa nú að hugsa um og bera ábyrgð á, þess utan eru almennu borgararnir ákveðin auðlind fyrir Úkraínumenn því þeir geta notað þá í áróðursskyni.
Á þeim svæðum, sem Úkraínumenn hafa á valdi sínu, bera þeir nú ábyrgð á velferð almennra rússneskra borgara að sögn Oleksi Melny, hernaðarsérfræðings hjá úkraínsku hugveitunni Razumkov. Jótlandspósturinn hefur eftir honum að samkvæmt alþjóðalögum sé Úkraína nú hernámsvald og óháð því hversu lengi Úkraínumenn hafa hugsað sér að halda svæðinu, þá hvíli ákveðnar skyldur á herðum þeirra hvað varðar almenna borgara. Þetta gildri bæði um öryggi þeirra og daglegar þarfi.
„Þetta er áskorun en eftir því sem ég heyri þá eru Úkraínumenn nú þegar byrjaðir að veita mannúðaraðstoð á svæðinu með því að dreifa vatni, mat og lyfjum. Fram að þessu hef ég ekki séð neinar traustar frásagnir um að illa hafi verið farið með almenna borgara,“ sagði hann.
Hann sagði að Úkraínumenn hafi ekki enn sem komið er mætt neinni mótspyrnu af hálfu almennra borgara svo heitið geti, hvorki friðsamlegri eða ofbeldisfullri.
Hann sagði að mesta hættan sem steðji að íbúum á herteknu svæðunum í Kúrsk sé frá Rússum en þeir nota 500 kg sprengur og stórskotalið í bardögum við úkraínska innrásarliðið.