Samkvæmt Veðurstofu Íslands gæti kvikuhlaup og jafnvel eldgos hafist hvenær sem er í Sundhnúksgígaröðinni. Aukning varð í skjálftavirkni um helgina og svipar henni nú mjög til þeirrar virkni sem átti sér stað í aðdraganda síðasta eldgoss í maí. Eins er rúmmál kvikunnar sem hefur nú safnast undir Svartsengi áætlað meira en fyrir síðasta gos.
Meira en 50 skjálftar hafa mælast frá miðnætti og í gær mældust 110 skjálftar. Um er að ræða aukningu dag frá degi en flestir skjálftarnir eru undir 1 að stærð en um helgina mældust þó tveir skjálftar yfir 2, annar þeirra skammt austan við Sýlingarfell og hinn á milli Hagafells og Sýlingarfells. Sá síðarnefndi var 2,5 að stærð sem er stærsti skjálftinn sem hefur mælst á svæðinu frá því að síðasta gosi lauk. Skjálftavirknin nú svipar mjög mikið til skjálftavirkninnar dagana fyrir eldgosið sem hófst 29. maí. Því er áfram líklegt að dragi til tíðinda á Sundhnúksgígaröðinni með kvikuhlaupi og jafnvel eldgosi.