Óhætt er að segja að auglýsing fyrir tíu fermetra herbergi í Grafarvogi sem birtist á Facebook-hópnum Leiga í gær hafi vakið athygli. Herbergið sem um ræðir er í Hamravík og er verðið fyrir herbergið 170 þúsund krónur á mánuði. Var það fyrirtækið Igloo sem birti auglýsinguna.

Tekið er skýrt fram að um sé að ræða skammtímaleigu í herbergi fyrir aðeins einn einstakling í íbúð sem deilt er með öðrum. Leigist herbergið til 31. desember næstkomandi.

Ekki kemur fram í auglýsingunni hversu mörg herbergi eru í íbúðinni eða hversu margir búa í henni, en þó er tekið fram að köttur búi þar.

Auglýsingin hefur sem fyrr segir vakið þó nokkrar umræður í hópnum og eru flestir á því að um sé að ræða heldur hátt verð. Hér má sjá dæmi um nokkrar athugasemdir undir auglýsingunni:

„Er þetta eitthvað grín eða hvað?“

„Dýrt er drottins orðið.

„Að fólk skuli leyfa sér þetta.“

„Þvílíkt okur“

Á öðrum þræði í hópnum eru sérstakar umræður um þessa tilteknu auglýsingu þar sem málshefjandi spyr hvort fólk sé virkilega að leigja 10 fermetra herbergi á 170 þúsund krónur.

„Nei, flutti úr landi,“ segir einn.

Einn í hópnum bendir á að ekki sé víst að þarna ráði græðgi för. Dæmi séu um að afborganir af fjögurra herbergja íbúð geti farið í 600 þúsund krónur á mánuði.

„Málið er bara að það var fullt af fólki sem tók óverðtryggð lán á breytilegum vöxtum og bankarnir eru að níðast á því fólki núna sem bregst við með því að reyna leigja herbergin út til að lenda síður í gjaldþroti! En þið virðist ekki fatta að ráðast á rót vandans og hjóla í alþingi sem er vandamálið,“ segir viðkomandi og taka margir undir með honum.