Tuttugu og fimm ára gamall maður, Pedro Henrique De Souza, hefur verið sakfelldur fyrir stórfellt fíkniefnabrot, en Pedro flutti hingað til lands 5.650 g af kókaíni með styrkleika 35-39%.

Pedro kom með flugi hingað til lands laugardaginn 9. mars. Við athugun á farangri hans kom í ljós að í ferðatöskunni hans var önnur ferðataska. Kom í ljós að svart gúmmíkennt efni var falið í báðum töskunum, í botni þeirra og hliðum, blanda af gúmmí, koffíni og kókaíni. Var það niðurstaða rannsóknarstofu Háskóla Íslands eftir rannsókn á efnunum að vinna mætti 5.650 g af kókaíni úr þeim.

Pedró játaði fyrir dómi að hafa flutt efnin til landsins en taldi að magnið hefði verið miklu minna, eða um 2,5 kg.

Pedró sagði að sér og fjölskyldu hans hefði verið hótað og hafi hann neyðst til að flytja efnin til landsins. Athugun hefur leitt í ljós að hann á ekki sakaferil að baki.

En magn efnanna er mikið og var það niðurstaða Héraðsdóms Reykjaness að dæma hann í 3 ára fangelsisvist.

Dóminn, sem kveðinn var upp 12. júlí, má lesa hér.