Gervigreind er orðin allsráðandi í nýjustu fartölvunum. Hún lærir á hegðun notanda, eykur rafhlöðuendingu, stillir af hljóð og bestar frammistöðu tölvunnar hverju sinni, án þess að draga úr afköstum, að sögn Trausta Eiríkssonar, sölustjóra hjá OK.
Hann segir að miklar uppfærslur hafi orðið á nýjustu tölvunum með aukinni áherslu á gervigreind. „Gervigreindin hjálpar okkur meira og meira. Það er kominn sérstakur „CoPilot” hnappur á lyklaborðið fyrir slíka vinnu. Rafhlöðuending eykst töluvert svo dæmi sé tekið. Gervigreindin er einnig nýtt til þess að besta notkun á hljóðnemum og skapar ákveðna hljóðvörn gagnvart utanaðkomandi hljóðum sem bætir gæði fjarfunda til muna,” segir Trausti í tilkynningu.
Hann segir að sem dæmi hafi HP tölvuframleiðandinn þróað svokallaða „Smart Sense“ lausn sem byggir á gervigreind og skiptir á milli þæginda og frammistöðu byggðrar á notkunarhegðun.
„Tölvurnar læra notkunarmynstur notandans til að auka rafhlöðuendingu. Tölvan áttar sig á því hvenær notandinn þarf á auknum krafti að halda, hvenær rólegri vinna á sér stað og hvenær er líklegast að notandann nýti sér hraðhleðslu. Slíkt eykur bæði líftíma vélarinnar, rafhlöðu og bætir upplifun notandans. Notendur þurfa ekki að velta þessu neitt fyrir sér, tölvan sér algjörlega um þessa hluti,” segir Trausti.
Þessu til viðbótar eru nýjar vélar með „Intel Core Ultra“ örgjörva. Þessi nýja tegund örgjörva er öflugri en áður hefur þekkst. Stærsta breytingin er að öll gervigreindarvinna er framkvæmd með sérstaklega hönnuðum hluta örgjörvans sem einblínir á gervigreind. Slíkt stýrir álagi tölvunnar betur og eykur einnig afköst í öðrum verkefnum.
Trausti segir að 90% af nýju vélunum frá HP séu úr magnesíum sem hægt er að endurnýta margoft. „Sífellt fleiri framleiðendur forðast plast eins og heitan eldinn og reyna að nýta önnur umhverfisvænni efni ef það er kostur. Ef það gengur ekki er reynt að endurnýta plastefni. Sem dæmi fiskinet og plast sem kemur úr sjó. Þá má nefna matarolíu og svo endurunnin trefjaefni.“
HP er einn fremsti framleiðandi á tölvubúnaði í heiminum og þegar kemur að því að nota endurunnin efni í framleiðsluna. HP hefur sjálfbærni að leiðarljósi og er HP brautryðjandi í þeim efnum.