Lögreglan á höfuðborgarsvæðinu handtók þrjá unga menn í gærkvöldi eftir að tilkynnt var um að þeir væru að brjóta rúðu á húsi í íbúðahverfi í Kópavogi.
Að sögn lögreglu voru drengirnir farnir af vettvangi áður en lögregla kom en komu aftur og brutu aðra rúðu. Drengirnir komu sér aftur undan en ekki leið á löngu þar til þeir létu aftur að sér kveða en þá voru þeir að brjóta rúðu í strætisvagnaskýli.
„Lögregla hafði uppi á drengjunum í þetta skiptið þar sem kom í ljós að þeir voru með kúbein, hamar og hníf meðferðis. Einn drengjanna réðst á einn lögreglumann með barefli við handtöku þremenninganna áður en hann var yfirbugaður.“
Í skeyti lögreglu segir að tveir drengjanna hafi verið undir 18 ára og einn undir 15 ára. Sá sem réðst á lögreglu var 18 ára og var vistaður í fangaklefa en hinir voru fluttir í önnur úrræði í samráði við foreldra og barnaverndarnefnd.
Að sögn lögreglu var einn drengjanna með ítrekaðar líflátshótanir í garð lögreglumanna en drengirnir eru sagðir eiga yfir höfði sér fjölda kæra vegna málsins.