Bílstjóri rútu sem valt í Öxnadal þann 14. júní, með þeim afleiðingum að fjöldi farþega slasaðist, sumir alvarlega, hefur ítrekað verið úrskurðaður í farbann vegna rannsóknar málsins, nú síðast til 28. júlí. Landsréttur staðfesti þann úrskurð Héraðdóms Norðurlands eystra og hefur sá úrskurður nú verið birtur á vefsíðu dómstólanna.
Rútan lenti utan vegar í Öxnadal og valt. Um 20 tékkneskir túristar slösuðust, sumir alvarlega. Flestir voru fluttir á sjúkrahús á Akureyri en fimm var flogið með þyrlu Landshelgisgæslunnar til Reykjavíkur á Landspítalann. Sumir farþegarnir hlutu beinbrot og aðrir alvarlega innvortis áverka.
Í gæsluvarðhaldsúrskurðinum kemur fram að bílstjóri rútunnar sé erlendur og sé eingöngu ferðamaður hér á landi og með engin önnur tengsl við landið. Því sé mikil hætta á því að hann fari úr landi og láti sig hverfa ef hann er ekki í farbanni. Um málsatvik segir ennfremur:
„Bifreiðin virðist vera sérsmíðuð vörubifreið með húsi fyrir farþega og ökumannsrými lokað af frá farþegarými. Bifreiðin virðist hafa oltið eina og hálfa veltu. Litlar upplýsingar liggja fyrir um öryggisbúnað líkt og öryggisbelti, en samkvæmt frásögn vitna kastaðist nokkur fjöldi farþega út úr bifreiðinni við veltuna. Þá virðist sem verkfæri og varahlutir fyrir bifreiðina sem geymdir voru í hólfi í gólfi í farþegarými hafi losnað og flogið um farþegarými við bílveltuna. Þá liggur fyrir að lögregla á Suðurlandi hafði afskipti af sakborningi þar sem hann var staddur við […]og var ökuriti bifreiðarinnar þá óvirkur ([…]). Þá kom fram í skýrslu ökumanns að hraðamælir bifreiðarinnar hafi verið óvirkur og að hann hafi notast við GPS-búnað í farsíma sínum til að fylgjast með hraða ökutækisins. Bíltæknirannsókn hefur farið fram og ernú unnið nánar úr þeim niðurstöðum.“
Í úrskurðinum kemur ennfremur fram að rannsókn málsins sé á lokametrunum en hún sé afar umfangsmikil. Beinist rannsóknin meðal annars að því hvort rekja megi slysið til gáleysis af hálfu ökumannsins, er varðar búnað eða ástand bílsins. Er mögulegt að maðurinn verði dæmdur í fjögurra ára fagnelsi ef hann verður fundinn sekur um slíka vanræsklu.
Rannsókn á bílstjóranum leiddi í ljós að hann var ekki undir áhrifum áfengis eða ólöglegra efna við aksturinn er slysið varð.