Seinni þennan örlagaríka dag á Biden síðan að hafa fundað með traustum ráðgjöfum sínum, Steve Ricchetti og Mike Donilon. Þeir hafi greint honum frá því hversu erfitt það hafi skyndilega orðið að safna fé í kosningabaráttuna en einnig kynnt fyrir Biden skoðanakannanir sem bent hafi til þess að sigurmöguleikar hans gegn Trump væru að engu orðnir.
Ekki bara var útlitið orðið svart í nokkrum mikilvægum sveifluríkjum heldur var staðan líka að verða slæm í ríkjum sem nánast undantekningarlaust tilheyra Demókrötum eins og Virginía og Nýja Mexíkó. Fundurinn hafi gert það að verkum að Biden þurfti að horfast í augu við það framboð hans var á enda runnið.
Þá hafi Nancy Pelosi, fyrrverandi forseti fulltrúadeildar Bandaríkjaþings, einnig skipt sköpum. Hún hafi þrýst verulega á Biden undanfarna daga og tilkynnt honum að ef hann stigi ekki til hliðar þá þyrfti hún að stíga fram í fjölmiðlum og segja skoðun sína afdráttarlaust.
Biden hafi því að lokum séð sæng sína útbreidda, tilkynnt ákvörðun sína litlum hópi náinna samstarfsmanna og lét síðan sprengjuna falla á samfélagsmiðlum.
Eins og alþjóð veit lýsti Biden yfir stuðningi við varaforseta sinn, Kamölu Harris, í komandi baráttu. Allt bendir nú til þess að hún muni hreppa hnossið og verða útnefnd sem forsetaefni Demókrata á komandi flokksþingi. Margir mögulegir keppinautar hennar hafa þegar lýst yfir stuðningi við hana og þá er það styrkleikamerki fyrir hana að framlög til kosningabaráttu Demókrata hefur tekið mikið stökk eftir að Biden sagði af sér.