Flugvél sem átti að fljúga frá Edinborg til Keflavíkur í gær var stöðvuð vegna bilunar rétt áður en flugtak átti að hefjast. Fluginu var seinna aflýst þar sem ekki tókst að laga bilunina.
Flugið, sem var á vegum breska lággjaldaflugfélagsins Easyjet, átti að vera í gærmorgun. Farþegar og farangur voru komin um borð og allt til reiðu fyrir flugtak.
Í frétt Daily Record um málið er haft eftir farþega að flugvélin hafi keyrt út á flugbrautina og beðið eftir leyfi til að fara af stað þegar allt var skyndilega stöðvað. Var farþegunum tjáð að um tæknilegt vandamál væri að ræða, vélinni keyrt til baka og hún tæmd. Seinna var greint frá því að fluginu hefði verið aflýst.
Að sögn talsmanna Easyjet er öryggi farþeganna og áhafnar í fyrsta forgangi hjá flugfélaginu. Þegar ljóst var að ekki væri hægt að laga vandamálið samstundis var ákveðið að stöðva flugvélina.
Farþegunum hefur verið boðið að fara í annað flug til Íslands frítt, fá flugferðina endurgreidda eða að fá inneignarnótu hjá Easyjet til þess að nota seinna.
„Við biðjumst velvirðingar á að fluginu hafi verið aflýst. Þetta var gert vegna öryggisráðstafana fyrir ykkur og áhöfnina okkar sem er í fyrsta forgangi og tæknilega vandamálið í flugvélinni var ekki hægt að laga,“ segir í yfirlýsingu frá flugfélaginu. „Við skiljum að þessar fréttir eru vonbrigði en við viljum gera það eins auðvelt og hugsast er fyrir ykkur að gera nýjar áætlanir.“
Upplýsingarnar megi finna á vefsíðu og appi flugfélagsins. Samkvæmt Daily Record er ekki vitað hvort búið sé að endurskipuleggja flugið til Keflavíkur.
Ekki er greint frá því hvers eðlis tæknilega vandamálið hafi verið. Í fréttum er ekki sagt að það hafi nokkuð tengst hinum miklu bilunum Microsoft fyrir helgi. En þær bilanir höfðu mikil áhrif á bókunarkerfi flugvalla og var fjölda fluga seinkað eða aflýst vegna hennar, meðal annars mjög mörgum í Bandaríkjunum og Tyrklandi.
Flugið frá Edinborg til Keflavíkur í gær er annað flugið á aðeins einni viku sem Easyjet hefur þurft að stöðva eftir að farþegar voru komnir um borð og vélin komin út á flugbrautina. En fyrir skömmu var flug frá Edinborg til Tyrklands stöðvað á seinustu stundu eftir alvarlegt atvik þar sem farþegi þurfti á læknisaðstoð að halda.
