KAPP ehf afhenti Ný-Fisk fyrsta eintakið af nýrri og byltingakenndri krapavél í höfuðstöðvum Ný-Fisks í Sandgerði í gær. Vélin er fyrsta krapavélin með CO2 sem er fjöldaframleidd í heiminum. CO2 er nú í boði fyrir allar OptimICE krapavélar á markaðnum. Vélin er knúin 100% CO2 kælimiðli. Orkunotkunin er mun minni með CO2 krapavél heldur en í eldri vélum.

Í tilkynningu kemur fram að öll hönnun, þróun og smíði á vélinni hefur verið hjá KAPP, þar sem allar krapavélar hafa verið framleiddar. Hönnunin var lengi í þróun og unnin í samstarfi við nokkur erlend fyrirtæki, hvert með sérþekkingu á sínu sviði. OptimICE hefur verið selt um allan heim síðan 1999 með miklum árangri og flestar stærstu útgerðir bæði á Íslandi og erlendis eru með OptimICE  í skipum sínum og einnig í landvinnslu.

,,OptimICE vélarnar hafa valdið byltingu í kælingu á fiski og kom í stað fyrir hefðbundinn flöguís. Með OptimICE  hraðkælingu verður öll vinnuaðstaða mun auðveldari enda er krapinn unninn úr sjó um borð í skipum og einfaldlega sprautað úr slöngu yfir fiskinn,“ segir Heimir Halldórsson, viðskiptastjóri hjá KAPP.

,,Þar sem OptimICE er fljótandi þá umlykur krapinn allan fiskinn og kælir hann rétt undir frostmark á um einni klst. og helst hitastigið þannig allan túrinn. Hraðkælingin umlykur fiskinn, kemur honum hratt niður fyrir 0°C og heldur honum í kringum -0,5 °C allan veiðitúrinn, í löndun, í flutningi þvert í kringum landið og allt til endanlegs viðskiptavinar. Kælikeðjan rofnar því aldrei með OptimICE og fiskurinn helst ferskur í hámarksgæðum allan tímann,“ segir Heimir. Hann nefnir að kæling með flöguís tekur um fimmtán klst. og nái samt ekki að komast undir 0°C. Hillutíminn lengist með OptimICE kælingu um 5-7 daga. Nýja vélin var kynnt á sjávarútvegssýningunni í Barcelona í vor og fékk mikla athygli á sýningarbás KAPP þar. 

KAPP er með söluskrifstofur erlendis í Noregi, Frakklandi, Englandi, Færeyjum, Bandaríkjunum og Mexikó.