Gavin Plumb, 37 ára öryggisvörður, hefur verið dæmdur í lífstíðarfangelsi fyrir að hafa ráðgert að ræna einni af þekktari sjónvarpsstjörnum Breta, Holly Willoughby, nauðga henni og drepa. Plumb þarf að sitja inni í að lágmarki 15 ár en ráðabrugg hans var sagt svo viðurstyggilegt að aðeins lítill hluti þess hefur verið gerður opinber.

Þegar Plumb, sem er tveggja barna faðir, var handtekinn var hann með meira en  10 þúsund myndir sjónvarpskonunni í snjallsíma sínum,

Þreyttur á því að dreyma og vildi fremja ódæðið

Í dómstólnum kom fram að Plumb hafði vakið athygli lögreglumanna í Bandaríkjunum fyrir að tjá sig fjálglega um áform sín í spjallsíðu á netinu þar sem ýmis myrkraverk voru rædd. Sagðist Plumb dreyma um að ráðast að Willoughby, svæfa hana með klóróformi og síðan hugðist hann að draga hana ofan í kjallara þar sem enginn gæti heyrt í henni, nauðga henni þar og síðan drepa. Sagði hann meðal annars á spjallsíðunni að hann væri orðinn þreyttur á því að láta sig dreyma um ódæðið, brátt vildi hann láta verða af því.

Átti Plumb nokkur samtöl við lögreglumann sem þóttist hafa áhuga á sjúkum hugarórum hans og var sú vinna lykillinn að því að upp komst um áform níðingsins.

Ætlaði að fá flugumann til að aðstoða

Þegar Plumb var handtekinn fundust vopn á heimili hans sem og margvíslegur búnaður sem nauðsynlegur væri til þess að koma áætlunum ahns í verk. Þá kom í ljós að hann hafði einnig sett sig í samband við flugumann frá Bandaríkjunum og hafði skoðað þann möguleika að fljúga honum til Bretlands til þess að hjálpa sér við að ræna og drepa Wolloughby.

Plumb sýndi engin viðbrögð þegar dómurinn var kveðinn upp. Starði tómum augum á dómarann og klóraði sér í kinninni. Stuttu síðar sneri hann sér þó að kvenkyns öryggisverði og muldraði að hann hefði núna 15 ár til að drepa sjálfan sig.

Hafði gríðarleg áhrif á stjörnuna

Við dómsuppkvaðningu hrósaði dómari málsins Willoughby fyrir að hafna þeim rétti sínum að nafn hennar kæmi ekki fram í dómsskj0lum. Það gerði hún til að vekja athygli á málinu og tryggja að af því væru fluttar fréttir. Tilgangurinn væri að opna augu fólks fyrir þeim margvíslegu ógnum sem konur, sem aðeins eru að sinna vinnu sinni, geta orðið fyrir.

Þó var vitnisburður hennar, um þau áhrif sem málið hefði haft á hana, fyrir dómi ekki gerður opinber. Eðli málsins samkvæmt var um gríðarlegt áfall að ræða fyrir Willoughby.