Ákæra var birt í dag í stóra fíkniefnamálinu, sem varðar innflutning á sex kílóum á kókaíni og amfetamíni, auk peningaþvættis, ólöglegrar vopnavörslu og skipulagðrar glæpastarsemi.
Átján manns hafa verið með réttarstöðu sakbornings í málinu, konur og karlar, en þau voru ekki öll ákærð. Málið verður þingfest í byrjun ágúst.
Flestir eru annaðhvort með einn eða tvo ákæruliði í málinu, skipulagða glæpastarfsemi og innflutning fíkniefna. Sumir eru aðeins ákærðir fyrir annað af þessu. Höfuðpaurarnir í málinu eru þó með fleiri ákæruliði.
Höfuðpaurarnir fjórir, sem hafa setið í gæsluvarðhaldi vegna málsins, komu fyrir dómara í dag og voru úrskurðaðir í gæsluvarðhald til 2. ágúst.
Samkvæmt heimildum DV eru fáir ákærðu með brotaferil og flestir flokkast sem rólegt fjölskyldufólk. Bæði konur og karlar eru á meðal sakborninga en DV hefur ekki upplýsingar um kynjahlutfallið. Í tilkynningu frá lögreglu við lok rannsóknar þess kom fram að málið snúi að skipulagðri brotastarfsemi, innflutningi og sölu og dreifingu á fíkniefnum hér á landi, peningaþvætti og vopnalagabrotum. „Lögregla lagði meðal annars hald á fíkniefni, lyf, stera og um 40 milljónir króna í reiðufé, auk nokkurra peningatalningavéla. Þá haldlagði lögregla ýmsar gerðir af skotvopnum og öðrum vopnum, m.a. skammbyssu búna hljóðdeyfi,“ segir í tilkynningu lögreglu. DV hefur heimildir fyrir því að vopnafundurinn hafi vakið undrun margra sakborninga sem kannast ekki við neina umsýslu með vopn.
Í tilkynningunni sagði ennfremur:
„Flestir sakborninganna voru handteknir í aðgerðum lögreglu um miðjan apríl, en þá stóð hópurinn fyrir komu tveggja manna sem fluttu fíkniefni til landsins með skemmtiferðaskipi. Í kjölfarið voru fimm aðilar úrskurðaðir í gæsluvarðhald og sæta því enn, utan eins þeirra. Sá var færður í afplánun vegna eldri dóms að loknu einnar viku gæsluvarðhaldi. Í dag hafa 18 aðilar stöðu sakbornings í málinu.“