Veðurstofan sendi fyrir helgi frá sér tilkynningu um að landris í Svartsengi haldi áfram með auknum hraða og nýtt kvikuhlaup eða eldgos sé líklegt á næstu vikum.
„Nýjustu aflögunarmælingarnar (bæði GNSS og InSAR gervitunglamyndir) sýna að landrísið undir Svartsengi heldur áfram. Hraði landrisins jókst eftir að gosi lauk og er nú orðin meiri en það sem mældist fyrir gosið sem hófst 29. maí. Hraða aflögunar má túlka sem að kvikuinnstreymi inn í kvikuhvolfið á 4-5 km dýpi haldi áfram,“ sagði í tilkynningunni.
Þorvaldur Þórðarson eldfjallafræðingur tekur þessari tilkynningu Veðurstofunnar með fyrirvara. Telur hann að ekki muni gjósa á næstunni í Sundhnúkagígum. Þetta kemur fram í viðtali Þorvaldar við mbl.is.
Þorvaldur segir:
„Landris í Svartsengi hófst um það bil fjórum dögum eftir að síðasta eldgos hófst, en það hefur verið nokkuð hægt fram til þessa. Ég sé hinsvegar enga aukningu í landrisi út frá þeim gögnum sem ég hef undir höndum og get ekki séð að landrisið sé á sama hraða og það var í aðdraganda fyrri eldgosa. Því tek ég þessu öllu með fyrirvara.“
Segist Þorvaldur ekki fullyrða að túlkun Veðurstofunnar sé röng en segir að fleiri þættir spili inn í varðandi það hvort gjósa fari á næstunni. Til að mynda komi nýtt gos í Svartsengi aðeins til greina ef grynnra kvikuhólfið þar undir fyllist að þolmörkum, en Þorvaldur segir ólíklegt að það gerist í bráð.
Þorvaldur segir allt eins líklegt að öll eldsumbrotum í Sundhnúksgígaröðinni sé lokið. Það sé ein túlkunin á þeim gögnum sem liggja fyrir. „Við vitum ekkert hvernig pípurnar eru þarna niðri. Ef við horfum á stærri myndina þá hefur dregist jafnt og þétt úr flæði úr dýpra kvikuhólfinu í hið grynnra. Samdráttur á kvikustreymi í grynnra kvikuhólfið er hraðari en aukning á landrisinu í Svartsengi. Miðað við það er alveg eins líklegt að það hætti að gjósa þarna,“ segir Þorvaldur.