Rússar ráðast yfirleitt á orkuinnviði í Úkraínu að næturlagi og á sama tíma ráðast Úkraínumenn á olíuinnviði í Rússlandi og hernaðarleg skotmörk í Úkraínu.
Á síðustu vikum hafa Úkraínumenn verið iðnir við árásir á Krímskaga og hafa margar fréttir borist af dróna- og flugskeytaárásum á skagann en hann er hersetinn af Rússum. Meðal annars segjast Úkraínumenn hafa hæft 15 loftvarnarkerfi á skaganum á skömmum tíma.
Það eru vestræn vopn á borð við Atacms-flugskeytakerfið sem gera þeim kleift að gera þessar árásir á Krím og þeir hika ekki við að ráðast á skagann.
Karsten Marrup, majór og yfirmaður hjá danska varnarmálaskólanum, sagði í samtali við Jótlandspóstinn að Úkraínumenn hafi nú um langa hríð ráðist á hin ýmsu skotmörk á Krím. Meginmarkmiðið sé að eyðileggja valin skotmörk en einnig að senda Rússum skilaboð um að þeir séu ekki öruggir á Krím. Að þar geti þeir ekki verið öruggir um hermenn, skip eða flugvélar.
Frá 12. til 18. júní breyttu Rússar um taktík í árásum sínum á Úkraínu með flugskeytum. Þeir einbeittu sér þá að herflugvöllum. Marrup sagði að ástæðan sé líklega pirringur yfir velheppnuðum loftárásum Úkraínumanna og einnig hafi Rússar miklar áhyggjur af F-16 orustuþotunum sem Úkraínumenn fá fljótlega.
Storm Shadow og Scalp flugskeytum er skotið frá úkraínskum SU-24 orustuþotum og það vita Rússar vel. Þeir vita einnig að Úkraínumenn eiga fáar slíkar vélar og því vilja Rússar granda þeim til að koma í veg fyrir að Úkraínumenn geti skotið þessum langdrægu flugskeytum frá þeim.