Netárás var gerð á Morgunblaðið í gær með þeim afleiðingum að mikið magn gagna var tekið í gíslingu. Lá fréttavefur Morgunblaðsins, mbl.is, niðri frá klukkan 17 í gær til klukkan 20 og þá var ekki hægt að vinna í ritstjórnarkerfi Morgunblaðsins og útsendingar K100 lágu niðri.
„Öll gögn voru í reynd tekin og dulkóðuð, bæði afrit og gögn sem unnið er með dags daglega. Það á við um öll tölvukerfi Árvakurs,“ segir Úlfar Ragnarsson, forstöðumaður upplýsingatæknisviðs Árvakurs, í frétt mbl.is og segir hann að staðan sé grafalvarleg og eiginlega eins slæm og hún getur orðið.
Rússneskur hópur hakkara, sem kallar sig Akira, er sagður standa á bak við árásina en talið er hann hafi einnig verið á bak við árásir á tölvukerfi Háskólans í Reykjavík og tölvukerfi bílaumboðsins Brimborgar.
Hólmfríður var í vinnu í gær þegar hún fór að taka eftir hökti í tölvukerfinu upp úr hádegi. Þegar hún hafði samband við tölvudeildina voru menn nýbúnir að gera sér grein fyrir því að um netárás væri að ræða.
„Alla jafna er fámennt hér í Hádegismóum á sunnudögum en nú var húsið allt í einu fullt af fólki. Menn gerðu sér snemma grein fyrir því að staðan væri alvarleg,“ segir Hólmfríður en blaðamenn héldu áfram vinnu sinni utan kerfis ef úr rættist. „Þetta er ekki dagur sem ég mun gleyma í bráð,“ segir hún við mbl.is.