Lögreglan á höfuðborgarsvæðinu greindi frá því í dagbók sinni í morgun að tveir voru í nótt handteknir eftir stórfellda líkamsárás þar sem meðal annars var bitið eyra af manni.
Nú hefur lögregla gefið skýrari mynd af atvikinu en í samtali við Vísi segir Unnar Már Ástþórsson, aðalvarðstjóri lögreglunnar á Hverfisgötu, að átökin hafi átt sér stað rétt fyrir klukkan fjögur í nótt og ekki hafi verið um slagsmál að ræða heldur líkamsárás þar sem tveir ráðast á einn.
„Það eru slagsmál þarna þar sem tveir ráðast að einum og enda á því að einn gerandinn bítur í annað eyra þolandans. Hann bítur talsvert stóran bita úr eyranu.“
Þolandinn er ekki alvarlega særður, fyrir utan að hafa tapað hluta úr öðru eyra, en viðkomandi er þó marinn og aumur. Átökin hófust að sögn lögreglu með orðaskaki sem endaði með framangreindum hætti.
Heimir Ríkarðsson, lögreglufulltrúi, segir í samtali við mbl.is að atvikið átti sér stað inni á salerni á skemmtistaðnum Kiki. Gerendur og þolandi séu allir karlmenn í kringum fimmtugt.