Fyrrum forseti Bandaríkjanna Donald Trump var í dag sakfelldur í öllum ákæruliðum í sakamáli sem var höfðað gegn honum út af svonefndum þöggunargreiðslum.
Hann var fundinn sekur um að hafa falsað gögn til að leyna greiðslum til fyrrum klámstjörnunnar Stormy Daniels sem hann hafði átt í nánu samneyti við. Hann er fyrsti fráfarandi forseta Bandaríkjanna sem er sakfelldur fyrir glæp.
Sakfellingin mun ekki hafa áhrif á möguleika Trump til að ná aftur embætti að sögn BBC. Fá skilyrði er að finna fyrir kjörgengi til embættisins. Frambjóðendur þurfa að vera 35 ára gamlir, bandarískir ríkisborgarar og þurfa að hafa veri búsettir í minnst 14 ár í Bandaríkjunum fyrir kjördag. Engar reglur útiloka fólki á sakaskrá að bjóða sig fram. Tæknilega séð mættu fangar í rauninni bjóða sig fram ef út í það er farið.
Trump yfirgaf dómsalinn í fússi eftir að kviðdómur las upp dóm sinn. Hann er með lögreglufylgd en mun þó vera fastur í umferðarteppu. Að sögn CNN starði Trump fram fyrir sig á meðan dómurinn var lesinn upp. Lögmaður hans krafðist svo að dómari myndi sýkna Trump þrátt fyrir niðurstöðu kviðdóms. Dómarinnneitaði því. Þá gretti Trump sig, tók í hönd sonar síns, Eric Trump, og byrjaði svo strax að ganga út úr dómsal, rauður í framan. Bæði Trump og sonur hans hafi verið í uppnámi.
Trump tjáði sig fyrir utan dómsalinn þar sem hann sagði að niðurstaða málsins hafi verið ákveðin fyrir fram af andstæðingum hans og að skömm væri að þessu.
„Við gerðum ekkert rangt. Ég er mjög saklaus maður.“
Trump kennir sitjandi forseta, Joe Biden, um niðurstöðuna. Það sé verið að reyna að snúa öllu landinu gegn honum.
„Þetta kemur frá Biden stjórninni til að skaða eða meiða andstæðing, pólitískan andstæðing,“ sagði Trump við fjölmiðla.
„Við munum halda áfram að berjast, við berjumst allt til enda og við munum sigra því landið okkar er farið til fjandans,“ sagði Trump og sagði að Bandaríkin séu svo sundruð að varla sé hægt að tala um heildstæða þjóð lengur.
„Við munum berjast fyrir stjórnarskránni. Þetta er engan veginn búið.“
Fastlega er reiknað með því að Trump muni áfrýja niðurstöðunni, sama hversu þunga refsingu hann kemur til með að fá. Það er svo í Bandaríkjunum að gjarnan er kveðinn upp dómur um sekt eða sýknu og að því loknu ákveður dómari refsingu í nýju þinghaldi.
Sakfelling Trump virðist þó ekki ætla að draga úr stuðningi við hann. Talið er líklegt að nú muni stuðningsmenn líta á Trump sem píslarvott en Eric skrifaði á Twitter fljótlega eftir að þeir gengu úr dómsal að þetta hafi verið dagurinn sem muni tryggja Trump kjör. Það muni sýna sig og sanna í nóvember þegar gengið verður til kosninga að 30. maí hafi verið hinn raunverulegi kjördagur.
Trump sagði enda sjálfur áður enn hann yfirgaf dómshúsið að raunverulegi dómurinn verði kveðinn upp af fólkinu í landinu þann 5. nóvember.
Samskiptastjóri framboðs Joe Biden hefur gefið út yfirlýsingu fyrir framboðið þar sem segir að enginn sé yfir lögin hafinn. Þetta hafi dómstóllinn í New York sannað í dag.
„Donald Trump hefur ranglega haldið því að hann muni aldrei þurfa að horfast í augu við afleiðingar þess að brjóta lög til persónulegs framdráttar“
Fólk er hvatt til að kjósa. Bandaríkjamenn horfist nú í augu við það að dæmdur maður geti sest í æðsta embætti þjóðarinnar. Það sé undir kjósendum komið að koma í veg fyrir það. Alveg sama hvort Trump sé glæpamaður eða ekki þá verði hann forsetaefni Repúblíkana flokksins.
Fréttin verður uppfærð
