Stjórn Skóla ehf hefur ákveðið að skipta um leikskólastjóra á leikskólanum Sólborg í Sandgerði. Stjórnarformaðurinn segir að myglu og mannekluvandamálin eigi að leysast þegar starfsemin verður flutt í nýtt húsnæði.

DV fjallaði um málið á laugardag. En foreldrar leikskólabarna í bænum hafa lýst mikilli reiði gagnvart bæjarstjórn og rekstraraðilanum Skólum ehf, sem tóku við starfseminni á síðasta ári af Hjallastefnunni. Er gremjan vegna mikillar manneklu, lokunum deilda, mygluvanda, veikindum og ráðningu leikskólastjóra sem sumt starfsfólk var ekki sátt með.

Leikskólastjórinn hættir samstundis

Til að bregðast við stöðunni héldu Skólar ehf starfsmannafund, þar sem einnig voru mættir nokkrir foreldrar. Var mikið rætt um stöðu leikskólastjórans. Beint í kjölfarið var haldinn stjórnarfundur með formanni starfsmannafélags Suðurnesja sem talaði fyrir hönd starfsmannsins.

Í tilkynningu til foreldra og starfsmanna segir Guðmundur Pétursson, stjórnarformaður, að tekin hafi verið ákvörðun um að leikskólastjórinn hætti samstundis. Búið sé að ræða við hana og vinni hún ekki meira við leikskólann Sólborg.

Sjá einnig:

Mikil reiði foreldra í garð bæjarstjórnar Suðurnesjabæjar vegna myglaðs leikskóla – „Hafið manndóm og kallið til neyðarfundar strax!“

Tímabundið mun aðstoðarleikskólastjóri sinna störfum leikskólastjóra. Lögum samkvæmt verði staðan auglýst innan tíðar.

Vonast Guðmundur til þess að skapist friður um verkefnið. Það þurfi samstarf til þess að byggja upp flottan skóla.

Tjáir sig ekki um málefni starfsmanns

Í samtali við DV segist Guðmundur ekki geta tjáð sig um uppsögnina þar sem um sé að ræða málefni einstaks starfsmanns.

Hvað önnur vandamál skólans segir hann að þau muni lagast, svo sem mygluvandann.

„Við eigum ekki húsnæðið. Við eigum erfitt með að gera nokkuð í því í sjálfu sér,“ segir Guðmundur. Við erum að færa núna tvær deildir yfir á skólasel í grunnskólanum í Sandgerði. Það eru deildirnar þar sem talið er að sé mygla.“

Ástandið verði annað í haust

Hann jánkar því að það hafi verið mikil mannekla í vetur og það hafi þurft að loka deildum. Ástæðan séu mikil veikindi.

„Þetta er gamall vandi sem er að koma upp þarna. Þetta mun lagast í sjálfu sér þegar við erum búin að flytja deildirnar tvær sem mestu veikindin hafa verið á. Þegar við komum úr sumarleyfi förum við í nýtt og glæsilegt húsnæði,“ segir hann. Ástandið verði allt annað í haust.

Eins og áður segir hefur gagnrýni foreldra að mestu leyti verið gagnvart bæjarstjórn. Eins og DV greindi frá á laugardag verða málefni Sólborgar rædd á fundi bæjarráðs í dag, miðvikudag.