Japanir hafa sett á flot nýtt risastórt hvalveiðiskip, Kangei Maru. Verið er að reyna að auka hvalkjötsneyslu heimamanna eftir dalandi eftirspurn undanfarinnar ára.
„Veiðiði stóra hvali! Komiði heil heim aftur!“ Þetta stóð í bréfi sem hópur japanskra barna hafði sett saman fyrir vígsluathöfn skipsins á fimmtudag. Börnin höfðu einnig æft dansatriði fyrir vígsluna. Kangei Maru sigldi úr höfn í borginni Shimonoseki í norðaustur hluta landsins eins og segir í frétt AFP um málið.
Japanir eru, ásamt Íslendingum og Norðmönnum, ein af þremur þjóðum sem enn veiða stórhveli. Eins og flestir vita hafa veiðarnar verið mjög umdeildar. Líkt og á Íslandi hafa japönsk hvalveiðiskip verið hundelt og trufluð af hvalverndunarsinnum og þrýst hefur verið á stjórnmálamenn úr öllum áttum.
Eftirspurnin í Japan hefur verið á niðurleið síðan á sjötta áratug síðustu aldar og er það einkum eldra fólk sem leggur sér kjötið til munns. Unga fólkið vill ekki borða hval og margir stórmarkaðir í Japan neita að selja það innan sinna veggja.
Hins vegar hefur verið átak í Japan um að reyna að koma hvalkjöti aftur á diska landsmanna. Í ljósi þess að stórmarkaðir vilja ekki selja kjötið hafa sjálfsafgreiðslubúðir verið settar upp í Tókýó og nokkrum öðrum stórum borgum.
Hið nýja risavaxna hvalveiðiskip er einnig hluti af þessu átaki. Skipið er 9.300 tonn og hefur 100 manna áhöfn. Útbúnaðurinn um borð er mjög fullkominn og hægt er að vinna kjötið áður en það er fryst. Verður skipið mánuðum saman úti á Kyrrahafinu að veiðum.
Kostnaðurinn við smíði skipsins var 7,5 milljarðar jena, eða tæpir 7 milljarðar íslenskra króna. Reiknað er með að veiddir verða 200 hvalir fyrir árslok.
„Þetta er nýtt skip fyrir nýtt tímabil, tákn um að atvinnugreinin sé að snúa aftur,“ sagði Hideki Tokoro, forstjóri útgerðarinnar sem gerir út Kangei Maru.
