„Ég hætti í öllu og endaði bara einn í einhverjum skúr. Ég bjó í Vogum á Vatnsleysuströnd í húsi sem Annþór Karl Kristjánsson átti og hann var þá fangi á Litla Hrauni. Ég var meiri fangi úti í samfélaginu ófrjáls en hann á Litla Hrauni. Hann hringdi í mig einn dag og sagði bara: „Einar ertu til í að gera mér einn greiða? Ertu til í að hætta þessu krimmarugli, viltu gera það fyrir mig, þú ert allt of góður strákur til að vera í þessu kjaftæði, þitt hjartalag á ekki heima hérna. Samtalinu lauk, ég horfði bara á símann og hætti þessu,“
segir Einar Ágúst Víðisson söngvari sem er nýjasti gestur Kiddu Svarfdal í podcasti hennar Fullorðins.
Einar Ágúst segir Annþór hafa hjálpað honum mikið á erfiðum tímum í sínu lífi þrátt fyrir að þeir hafi lítið þekkst. „Hann er einn af þessu fólki sem hefur haft meiri trú á mér en ég sjálfur.“
Haustið 2004 var Einar Ágúst handtekinn vegna fíkniefnainnflutnings, og segist hann á einni viku hafa tapað öllu: mannorðinu, hjónabandinu, vinnunni, hljómsveitinni. Fjallað var um málið í fjölmiðlum á sínum tíma, meðal annars í DV.
Einar Ágúst komst ítrekað í kast við lögin meðan hann var í neyslu. „Vorið 2006 þegar ég var búinn að reyna að vera edrú og gengur aldrei neitt. Ég þori ekki út af minni trú og svo er ég heigull að eðlisfari þannig að ég þori ekki að drepa mig, en ég ætla bara að dópa mig í klessu og það gekk ógeðslega vel. Ég var kominn í brútal neyslu, var ákærður fyrir manndráp með ólöglegu skotvopni og pyntingar. Við tókum strák sem var að misnota konur og pyntuðum hann bara. Maður upplifði sig sem eitthvað dómsvald. Ég var kominn á ógeðslegan stað,“ segir Einar Ágúst og rifjar upp þegar hann sat með skotvopn og tilbúinn að enda líf sitt þegar bróðir hans hringdi og hann ákvað að svara. Segist Einar Ágúst vera ófeiminn við að segja frá svona atvikum í viðtölum og eftir þau leiti til hans ungir strákar sem segjast ekki hafa neinn til að tala við.
Einar Ágúst segist hafa verið beittur tveimur líkamsárásum á þessun tíma með mánaðarmillibili. „Ég þekki alla aðila í árásunum, og þetta eru bestu vinir mínir í dag, þetta eru dásamlegir drengir. Þessir hlutir gerast, eins og sponsorinn minn sagði: „Þú bjóst í húsi þekktasta handrukkara á Íslandi, rífandi kjaft á öllum vitlausum stöðum, auðvitað hlaut að enda með því að þú varst laminn.“ Segist Einar Ágúst hafa ákveðið að reyna einu sinni enn að verða edrú og gekk hann í 12 spora samtökin.
Einar Ágúst og Kidda ræða fjölmargt fleira í viðtalinu sem horfa má á í fullri lengd í áskrift á fullordins.is.
Í þessari frétt er fjallað um þunglyndi og sjálfsvíg. Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
